നിക്ഷേപം: ഇന്ത്യ-യുഎഇ ഉന്നതതല സംയുക്ത ടാസ്‌ക് ഫോഴ്‌സ് യോഗം ചേർന്നു

അബുദാബി/ മുംബൈ∙ ഇന്ത്യ-യുഎഇ ഹൈ ലെവൽ ജോയിന്‍റ് ടാസ്‌ക് ഫോഴ്‌സ് ഓൺ ഇൻവെസ്റ്റ്‌മെന്‍റ് (എച്ച്എൽജെടിഎഫ്ഐ) യുടെ 12-ാമത് യോഗം മുംബൈയിൽ നടന്നു. കേന്ദ്ര വാണിജ്യ വ്യവസായ മന്ത്രി പിയൂഷ് ഗോയൽ, അബുദാബി ഇൻവെസ്റ്റ്‌മെന്‍റ് അതോറിറ്റി മാനേജിങ് ഡയറക്ടർ ഷെയ്ഖ് ഹമദ് ബിൻ സായിദ് അൽ നഹ്യാൻ എന്നിവർ പങ്കെടുത്തു. ഇന്ത്യയും യുഎഇയും തമ്മിലുള്ള വ്യാപാരം, നിക്ഷേപം, സാമ്പത്തിക ബന്ധങ്ങൾ എന്നിവ പ്രോത്സാഹിപ്പിക്കുന്നതിനായി 2013 ലാണ് എച്ച്എൽജെടിഎഫ്ഐ സ്ഥാപിതമായത്. 

ഇരു രാജ്യങ്ങളിലെയും നിക്ഷേപകർ അഭിമുഖീകരിക്കുന്ന പ്രശ്‌നങ്ങൾ പരിഹരിക്കുന്നതിനുള്ള ഒരു ഫോറമായി പ്രവർത്തിക്കുമ്പോൾ തന്നെ ഇന്ത്യയിലും യുഎഇയിലും കൂടുതൽ നിക്ഷേപത്തിനുള്ള അവസരങ്ങളും സാധ്യതകളും ചർച്ച ചെയ്യുന്നതിനുള്ള ഫലപ്രദമായ പിന്തുണ നൽകിയിട്ടുണ്ട്.  വ്യാപാരം, നിക്ഷേപം എന്നിവയുമായി ബന്ധപ്പെട്ട കാര്യങ്ങളിൽ ഉൾപ്പെടെ ഇന്ത്യയും യുഎഇയും തമ്മിലുള്ള ഉഭയകക്ഷി ബന്ധത്തിന്‍റെ തുടർച്ചയായ വളർച്ചയും ശക്തിപ്പെടുത്തലും കൂടിക്കാഴ്ചയിൽ അംഗീകരിച്ചു. 

ഫെബ്രുവരിയിൽ പ്രധാനമന്ത്രി നരേന്ദ്ര മോദിയുടെ യുഎഇ സന്ദർശന വേളയിൽ ഒപ്പുവച്ച ഇന്ത്യ-യുഎഇ ഉഭയകക്ഷി നിക്ഷേപ ഉടമ്പടി ഇരുരാജ്യങ്ങളും അംഗീകരിക്കുകയും 2024 ഓഗസ്റ്റ് 31 മുതൽ പ്രാബല്യത്തിൽ വരികയും ചെയ്തു. 2022 മേയ് മാസത്തിൽ സമഗ്ര സാമ്പത്തിക പങ്കാളിത്ത കരാർ (സിഇപിഎ) നിലവിൽ വന്ന ഫോഴ്‌സ്, മിക്ക ഉൽപ്പന്ന ലൈനുകളിലും താരിഫ് കുറയ്ക്കാൻ സഹായിച്ചു, വ്യാപാരത്തിനുള്ള മറ്റ് തടസ്സങ്ങൾ പരിഹരിക്കുകയും സഹകരണത്തിന് പുതിയ വഴികൾ സൃഷ്ടിക്കുകയും ചെയ്തു.  ഉഭയകക്ഷി വ്യാപാരം തുടർച്ചയായി ഉയർന്നു, 2024-ന്‍റെ ആദ്യ പകുതിയിൽ എണ്ണ ഇതര വ്യാപാരം 28.2 ബില്യൻ യുഎസ് ഡോളറായി ഉയർന്നു, വർഷാവർഷം 9.8% വർധനവ് രേഖപ്പെടുത്തി. ഈ കരാർ എഫ്ഡിഐയെ പ്രോത്സാഹിപ്പിക്കുകയും ചെയ്തു. 

യുഎഇ ഇന്ത്യയിലെ നാലാമത്തെ വലിയ വിദേശ നിക്ഷേപകരാണ്.  ഇന്ത്യൻ അടിസ്ഥാന സൗകര്യ മേഖലകളിലെ ആസ്തികളിലെ യുഎഇ നിക്ഷേപങ്ങളും  പ്രാദേശിക കറൻസികളിലെ ഉഭയകക്ഷി വ്യാപാരം, ഇന്ത്യയുടെയും യുഎഇയുടെയും പേയ്‌മെന്‍റ് സംവിധാനങ്ങളുടെ സംയോജനം, സെൻട്രൽ ബാങ്ക് ഡിജിറ്റൽ കറൻസികളിലെ സഹകരണം, വെർച്വൽ ട്രേഡ് കോറിഡോറുമായി ബന്ധപ്പെട്ട പ്രവർത്തനങ്ങളുടെ തുടക്കം, വികസനം എന്നിവയുൾപ്പെടെ  സുപ്രധാന സംരംഭങ്ങളുടെ പുരോഗതിയും ഇരുപക്ഷവും അവലോകനം ചെയ്തു.   

റിന്യൂവബിൾ എനർജി, ഗ്രീൻ ഹൈഡ്രജൻ, ഫാർമസ്യൂട്ടിക്കൽസ്, ജീനോമിക്സ് തുടങ്ങിയ മുൻഗണനാ മേഖലകളിൽ നിക്ഷേപത്തിനുള്ള അവസരങ്ങൾ ഇന്ത്യൻ പക്ഷം പങ്കിട്ടു. അതേസമയം വ്യോമയാന വിപണിയുടെ ദ്രുതഗതിയിലുള്ള വളർച്ച കാരണം യുഎഇ പക്ഷം ഇന്ത്യയുടെ എയ്‌റോസ്‌പേസ് മേഖലയിൽ നിക്ഷേപത്തിനുള്ള അവസരങ്ങൾ ഉയർത്തി.  ഈ പ്രശ്നങ്ങൾ സമയബന്ധിതവും പരസ്പര സ്വീകാര്യവുമായ രീതിയിൽ പരിഹരിക്കുന്നതിന് രണ്ട് ടീമുകളോടും ബന്ധപ്പെട്ട സർക്കാർ സ്ഥാപനങ്ങളുമായി സഹകരിച്ച് പ്രവർത്തിക്കാൻ നിർദ്ദേശിച്ചു.