ബ്രിക്സ് ഉച്ചകോടി: യുഎഇ പ്രസിഡന്റ് നാളെ റഷ്യയിലേക്ക്

അബുദാബി ∙ ബ്രിക്സ് ഉച്ചകോടിയിൽ പങ്കെടുക്കാൻ യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ നാളെ റഷ്യയിലേക്ക്. കസാനിൽ 22, 23, 24 തീയതികളിലാണ് ഉച്ചകോടി. ബ്രിക്സ് അംഗമായ ശേഷം യുഎഇ പങ്കെടുക്കുന്ന പ്രഥമ ഉച്ചകോടിയാണിത്. ഇതോടനുബന്ധിച്ച് റഷ്യൻ പ്രസിഡന്റ് വ്ലാഡിമിർ പുട്ടിനുമായി ഷെയ്ഖ് മുഹമ്മദ് കൂടിക്കാഴ്ച നടത്തും.

ഉഭയകക്ഷി ബന്ധം, സാമ്പത്തികം, വ്യാപാരം, നിക്ഷേപം, ഊർജം തുടങ്ങിയ മേഖലകളിലെ സഹകരണം ശക്തമാക്കുന്നതിനൊപ്പം കൂടുതൽ മേഖലകളിലേക്കു വ്യാപിപ്പിക്കുന്നതും ചർച്ച ചെയ്യും. തന്ത്രപരമായ പങ്കാളിത്തവും മേഖലാ, രാജ്യാന്തര വിഷയങ്ങളും ചർച്ച ചെയ്യും.