അൽ ഐൻ പുസ്തകോത്സവം നവംബർ 17 മുതൽ 23 വരെ

അൽ ഐൻ ∙ അബുദാബി അറബിക് ലാംഗ്വേജ് സെന്‍റർ (എഎൽസി) സംഘടിപ്പിക്കുന്ന അൽ ഐൻ പുസ്തകോത്സവം നവംബർ 17 മുതൽ 23 വരെ നടക്കും. പ്രസാധകരുടെ എണ്ണത്തിൽ  റെക്കോർഡ് വർധനയാണ് ഇപ്രാവശ്യം രേഖപ്പെടുത്തിയത്. പുസ്തകോത്സവത്തിൽ 260 പ്രസാധകരാണ് റജിസ്ട്രേഷന് വേണ്ടി അപേക്ഷിച്ചിട്ടുള്ളത്.

കഴിഞ്ഞ വർഷത്തേക്കാൾ 73% വർധനയാണിത്.137 പ്രദർശകർ എ എൽ സിയുടെ 10% മുൻ‌കൂർ വിലക്കുറവിന്‍റെ ആനുകൂല്യം നേടി. 2472 ചതുരശ്ര മീറ്റർ വിസ്തൃതിയിലാണ് വേദി. റജിസ്‌ട്രേഷൻ അവസാനിച്ച സെപ്റ്റംബർ 19 ന് മുൻപ് തന്നെ മുഴുവൻ സ്റ്റാളുകളും വിറ്റുപോയതായി അധികൃതർ പറഞ്ഞു. ഈ പതിപ്പിൽ 150 പ്രദർശകർ 60000 ടൈറ്റിലുകൾ പ്രദർശിപ്പിക്കും.

400 പരിപാടികളും യുവാക്കൾക്കും കുട്ടികൾക്കും വേണ്ടി 500 വിദ്യാഭ്യാസ - വിനോദ ശില്പശാലകളും അരങ്ങേറും. പുസ്തകത്തെ ഒരു സാംസ്‌കാരിക ചിഹ്നമാക്കി പരിവർത്തനം ചെയ്യാനുള്ള എ എൽ സിയുടെ ശ്രമം വിജയിക്കുന്നതിന്‍റെ സാക്ഷ്യമാണ് വർധിച്ചുവരുന്ന പ്രാതിനിധ്യമെന്ന് ചെയർമാൻ ഡോ.അലി ബിൻ തമീം പറഞ്ഞു.