3,100 ചതുരശ്ര മീറ്റർ വിസ്തൃതി; ദുബായിലെ ആദ്യ എയർ ടാക്സി സ്റ്റേഷൻ ഒരുങ്ങുന്നു

ദുബായ് ∙ ആദ്യത്തെ എയർ ടാക്സി സ്റ്റേഷൻ ദുബായ് രാജ്യാന്തര വിമാനത്താവളത്തിനടുത്ത് ഉടൻ നിർമാണമാരംഭിക്കും. യുഎഇ ഉപപ്രധാനമന്ത്രിയും പ്രതിരോധ മന്ത്രിയും ദുബായ് കിരീടാവകാശിയുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂമാണ് ഇക്കാര്യം പ്രഖ്യാപിച്ചത്. ദുബായിയുടെ ആദ്യ ഏരിയൽ ടാക്സിയുടെ വെർടിപോർട് ദുബായ് രാജ്യാന്തര വിമാനത്താവളത്തിനടുത്ത് നിർമാണമാരംഭിക്കുന്നതായി അദ്ദേഹം എക്സ് പ്ലാറ്റ്ഫോമിൽ കുറിച്ചു.

3,100 ചതുരശ്ര മീറ്റർ വിസ്തൃതിയുള്ള ഈ കേന്ദ്രത്തിന് പ്രതിവർഷം 42,000 ലാൻഡിങ്ങുകളും 170,000 യാത്രക്കാരെയും കൈകാര്യം ചെയ്യാനുള്ള ശേഷിയുണ്ടാകും. പ്രാരംഭ ഘട്ടത്തിൽ ഡൗൺടൗൺ, ദുബായ് മറീന, പാം ജുമൈറ എന്നിവിടങ്ങളിലെ സ്റ്റേഷനുകൾ സേവനങ്ങൾ 2026 ൽ ആരംഭിക്കും. നവീകരണം, സുരക്ഷ, കൂടാതെ അതിന്റെ ദൃഢമായ പ്രതിബദ്ധതയോടെയുള്ള ചലനാത്മകത സുസ്ഥിരത എന്നിവയെല്ലാം കൊണ്ട് ദുബായുടെ ആഗോളഭാവി രൂപപ്പെടുത്തുന്നത് തുടരുന്നതായി അദ്ദേഹം കൂട്ടിച്ചേർത്തു.

ആദ്യത്തെ എയർ ടാക്സി സ്റ്റേഷന്റെ ഔദ്യോഗിക പ്രവർത്തനം 2026 ആദ്യ പാദത്തിൽ ആരംഭിക്കുമെന്ന് പ്രതീക്ഷിക്കുന്നു. കൂടാതെ പദ്ധതിയിൽ നാല് സ്റ്റേഷനുകളുടെ പ്രാരംഭവും ഉൾപ്പെടുന്നു. സേവനത്തിൻ്റെ ആദ്യ ഘട്ടത്തിൽ ദുബായിലെ നാല് തന്ത്രപ്രധാനമായ ലാൻഡിങ് സൈറ്റുകൾ ഉൾപ്പെടുന്നു - ദുബായ് രാജ്യാന്തര വിമാനത്താവളം, ഡൗൺടൗൺ, ദുബായ് മറീന, പാം ജുമൈറ.

അവ സ്‌കൈപോർട്ടുമായി സഹകരിച്ച് രൂപകല്പന ചെയ്യുകയും വികസിപ്പിക്കുകയും ചെയ്യും, അവയിൽ സമർപ്പിത ടേക് ഓഫ്, ലാൻഡിങ് ഏരിയകൾ, ഇലക്ട്രിക് ചാർജിങ് സൗകര്യങ്ങൾ,  പ്രത്യേക പാസഞ്ചർ ഏരിയ, സുരക്ഷാ നടപടിക്രമങ്ങൾ എന്നിവ ഉൾപ്പെടുന്നു. ദുബായ് രാജ്യാന്തര വിമാനത്താവളത്തിൽ നിന്ന് പാം ജുമൈറയിലേയ്ക്കുള്ള യാത്രാ സമയം 10-12 മിനിറ്റായി കുറയ്ക്കുമെന്ന് പ്രതീക്ഷിക്കുന്നതിനാൽ പുതിയ സർവീസ് ദുബായിലെ ഗതാഗതക്കുരുക്ക് ലഘൂകരിക്കാൻ സഹായിക്കും.