പ്രവാസി കോർഡിനേഷൻ കമ്മിറ്റി പ്രതിനിധികൾ ഖത്തറിലെ ഇന്ത്യൻ അംബാസഡറുമായി കൂടിക്കാഴ്ച്ച നടത്തി

ദോഹ ∙ ദോഹയിലെ ഇന്ത്യൻ എംബസിയിൽ പ്രവാസി കോർഡിനേഷൻ കമ്മിറ്റി (പിസിസി) പ്രതിനിധികൾ ഖത്തറിലെ ഇന്ത്യൻ അംബാസഡർ വിപുലുമായി കൂടിക്കാഴ്ച നടത്തി. ഇന്ത്യയിൽ നിന്ന് ഗൾഫ് രാജ്യങ്ങളിലേക്കുള്ള യാത്രക്കാർ ഉൾപ്പെടുന്ന ലഹരിമരുന്നുമായി ബന്ധപ്പെട്ട സംഭവങ്ങള്‍ പിസിസി പ്രതിനിധികൾ അംബാസഡറുടെ ശ്രദ്ധയിൽപ്പെടുത്തി. പി.സി.സി പ്രതിനിധി സംഘം ചെയർമാൻ അഡ്വ. നിസാർ കോച്ചേരി, ജനറൽ കൺവീനർ മഷ്ഹൂദ് വിസി, കോഓർഡിനേറ്റർ ജോപ്പച്ചൻ തെക്കേക്കുറ്റ്, ഐടി വിങ് ചെയർമാൻ സമീൽ അബ്ദുൾ വാഹിദ് എന്നിവർ സംബന്ധിച്ചു.

പ്രധാന ഇന്ത്യൻ രാജ്യാന്തര വിമാനത്താവളങ്ങളിൽ ലഹരിമരുന്ന് കണ്ടെത്തൽ സംവിധാനങ്ങൾ സ്ഥാപിക്കുന്നതിനുള്ള  പിസിസിയുടെ നിർദ്ദേശമായിരുന്നു യോഗത്തിന്‍റെ പ്രാഥമിക വിഷയം. ഇത്തരം പ്രതിരോധ നടപടികളുടെ നടപ്പിലാക്കൽ ഇന്ത്യൻ യാത്രക്കാർ അറിയാതെ നിരോധിത വസ്തുക്കൾ കൊണ്ടുപോകുന്നതിന്‍റെ അപകടസാധ്യത ഗണ്യമായി കുറയ്ക്കുമെന്നും അതുവഴി ഗൾഫ് മേഖലയിൽ ഇത്തരം സംഭവങ്ങൾ ഉണ്ടാക്കിയേക്കാവുന്ന ഗുരുതരമായ നിയമപരമായ പ്രത്യാഘാതങ്ങളിൽ നിന്ന് അവരെ സംരക്ഷിക്കുമെന്നും പിസിസി വിശ്വസിക്കുന്നു.

ഖത്തറിലും പുറത്തുമുള്ള ഇന്ത്യൻ പ്രവാസികളുടെ ക്ഷേമം സംരക്ഷിക്കുന്നതിനുള്ള പ്രതിജ്ഞാബദ്ധത ആവർത്തിച്ച്, മനസ്സിലാക്കുന്നതിനും പിന്തുണയ്ക്കുന്നതിനും അംബാസഡർ വിപുലിനോട് പിസിസി നന്ദി രേഖപ്പെടുത്തി.