ജ്വല്ലറി അറേബ്യയ്ക്ക് നാളെ തുടക്കമാകും

മനാമ ∙ നിരവധി  രാജ്യങ്ങളിൽ നിന്നുള്ള രാജ്യാന്തര  ബ്രാൻഡുകളുൾപ്പെടെയുള്ളവരുടെ പങ്കാളിത്തം കൊണ്ട് ശ്രദ്ധേയമാകുന്ന  ജ്വല്ലറി അറേബ്യയ്ക്ക്  26ന് ബഹ്‌റൈൻ എക്സിബിഷൻ വേൾഡിൽ തുടക്കമാകും.  30വരെ നടക്കുന്ന പ്രദർശനം ബഹ്‌റൈൻ കിരീടാവകാശിയും പ്രധാനമന്ത്രിയുമായ   സൽമാൻ ബിൻ ഹമദ് അൽ ഖലീഫ രാജകുമാരന്‍റെ  രക്ഷാകർതൃത്വത്തിലാണ് നടക്കുക.

ഇത്തവണ സെന്‍റ് എക്സിബിഷനും ഇതോടൊപ്പം നടക്കുന്നുണ്ട്.  രാജ്യത്തിനകത്തും പുറത്തുമുള്ള നിരവധി സ്വർണ്ണ, വജ്ര വ്യാപാരികളുടേയും മറ്റു  സന്ദർശകരുടെയും  ഒഴുക്ക് തന്നെയുണ്ടാകുമെന്നാണ് സംഘാടകർ പ്രതീക്ഷിക്കുന്നത്. കഴിഞ്ഞ വർഷത്തെ അപേക്ഷിച്ച് ഇത്തവണ 30 ശതമാനം പ്രദർശകരുടെ വർധനവ് ഉണ്ടായിട്ടുണ്ടെന്ന് സംഘാടകർ അറിയിച്ചു.

700ൽപരം ജ്വല്ലറി ബ്രാൻഡുകൾ ഒരേ മേൽക്കൂരയ്ക്ക് കീഴിൽ  കൊണ്ടുവരുന്ന ഈ പരിപാടി, ക്ലാസിക്, സമകാലിക ഡിസൈനുകൾ, ഫിനിഷ്ഡ് ആഭരണങ്ങൾ, ടൈംപീസുകൾ, വിലയേറിയ രത്നങ്ങൾ, ക്ലോക്കുകൾ, മികച്ച എഴുത്ത് ഉപകരണങ്ങൾ, ആഡംബര ആക്സസറികൾ എന്നിവയും ഉൾപ്പെടുന്ന പ്രദർശനമാണ്.എക്‌സിബിഷൻ വേൾഡ് ബഹ്‌റൈനിൽ 3, 5, 6, 7, 8 ഹാളുകളിൽ ആണ് പ്രദർശനം നടക്കുക. സംരംഭകർക്ക്  സ്റ്റാളുകൾ ലഭ്യമാക്കിയിട്ടുണ്ട്. അതിനായി ജ്വല്ലറി അറേബ്യയുടെ വെബ്‌സൈറ്റ് സന്ദർശിക്കാവുന്നതാണ്.

ഇന്ത്യൻ, ഏഷ്യൻ, ഇറ്റാലിയൻ രാജ്യങ്ങളുടെ  പവിലിയനുകളിൽ അസാധാരണമായ ഭാഗങ്ങൾ കണ്ടെത്തുക. ലോകത്തിലെ വിവിധ രാജ്യങ്ങളിലെ ഡിസൈനർമാരുടെ പുതിയ ഡിസൈനുകളുടെ പ്രദർശനം, കൂടാതെ ബഹ്‌റൈനിലെ വൈവിധ്യമാർന്ന പവലിയനുകളിൽ പ്രത്യേകം പ്രദർശനങ്ങളും ഉണ്ടാകും. ജ്വല്ലറി അറേബ്യയുടെ  വെബ്സൈറ്റ് ഇപ്പോൾ തന്നെ നിരവധി പേർ സന്ദർശിച്ച് വിസിറ്റിങ് പാസുകൾ കരസ്‌ഥമാക്കി കഴിഞ്ഞു.

കഴിഞ്ഞ വർഷങ്ങളിലെന്നപോലെ, ജ്വല്ലറി അറേബ്യ പോലുള്ള വിജയകരമായ പ്രദർശനങ്ങൾ രാജ്യത്തിന്റെ വാണിജ്യ വിജയത്തിലും സാമ്പത്തിക മേഖലയിലും  സുപ്രധാന പങ്ക് വഹിക്കുന്ന ഒന്നാണ്. പ്രാദേശിക റീട്ടെയിൽ വിപണിയിൽ ലഭ്യമല്ലാത്ത ആഡംബര ജ്വല്ലറി ബ്രാൻഡുകളിലേക്ക് ഷോപ്പർമാർക്ക് പ്രവേശനം നൽകുന്ന  ഒരു ഇവന്റ് കൂടിയാണ് ജ്വല്ലറി അറേബ്യ. ബഹ്‌റൈനിലെ മലയാളികൾ ഉൾപ്പെടെയുള്ള സ്വർണ്ണ വ്യാപാരികളും ഇന്ത്യയിൽ നിന്നുള്ള നിരവധി ബ്രാൻഡുകളും ഇത്തവണയും ഈ പ്രദർശനത്തിൽ സംബന്ധിക്കുന്നുണ്ട്.