‘മ്മടെ തൃശൂർ പൂരം’: നേരത്തേ ബുക്ക് ചെയ്താൽ ടിക്കറ്റ് നിരക്കിൽ ഇളവ്

ദുബായ് ∙ ‘മ്മടെ തൃശൂർ പൂര’ത്തിന്റെ ടിക്കറ്റുകൾ www.platinumlist.net എന്ന സൈറ്റിലൂടെ സ്വന്തമാക്കാം. സിംഗിൾ എൻട്രി ടിക്കറ്റിന് 75 ദിർഹവും, 4 പേർക്കുള്ള ടിക്കറ്റിന് 275 ദിർഹവും, 10 പേർക്കുള്ള ടിക്കറ്റിന് 649 ദിർഹവുമാണ് നിരക്ക്. േനരത്തേ ബുക്ക് ചെയ്യുന്നവർക്ക് ടിക്കറ്റ് നിരക്കിൽ ഇളവ് ലഭിക്കും. മടെ തൃശൂർ യുഎഇ, ഇക്വിറ്റി പ്ലസ് അഡ്വർടൈസിങ് എന്നിവർ ചേർന്നാണ് പൂരം യാഥാർഥ്യമാക്കുന്നത്. തൃശൂർ പൂരത്തിലെ പ്രധാന പരിപാടികൾക്കൊപ്പം വിധു പ്രതാപ്, അപർണ ബാലമുരളി, സ്രീരാഗ് ഭരതൻ എന്നിവരുടെ ലൈവ് മ്യൂസിക്കൽ നൈറ്റും പൂരപ്പറമ്പിൽ ഒരുക്കിയിട്ടുണ്ട്. ഒപ്പം അഗ്നി ബാൻഡിന്റെ പ്രകടനവും, ജെഎം ഫൈവിന്റെ ഡിജെയും പൂരപ്പറമ്പിൽ പാട്ടോളം നിറയ്ക്കും. രുചി വൈവിധ്യങ്ങൾ സമ്മേളിക്കുന്ന ‘പൂരം ഫുഡ് അടി ഫെസ്റ്റ്’ ഇത്തവണ ഒരുക്കിയിട്ടുണ്ട്. ഡിസംബർ 2ന് എത്തിസലാത്ത് അക്കാദമി ഗ്രൗണ്ടിലാണ് ‘മ്മടെ തൃശൂർ പൂരം’. 

രാവിലെ 8 മുതൽ രാത്രി 11 വരെയാണ് പരിപാടികൾ. മച്ചാട് മാമാങ്കം, തെച്ചിക്കോട്ട് രാമചന്ദ്രൻ, പാമ്പാടി രാജൻ തുടങ്ങിയ 5 ഗജവീരന്മാരുടെ റോബട്ടിക് മാതൃകകളും അണിനിരക്കും. കൂടാതെ  അഞ്ച് മേളങ്ങളുടെ പെരുക്കവും പൂരത്തിലുണ്ടാകും. ഇത്തവണ ആനച്ചമയ പ്രദർശനവും പ്രവാസലോകത്തെ പൂരത്തിന് കൊഴുപ്പേകാനുണ്ടാകും.