മാർ റാഫേൽ തട്ടിൽ നാളെ യുഎഇയിൽ എത്തും

അബുദാബി ∙ സിറോ മലബാർ സഭ മേജർ ആർച്ച് ബിഷപ് മാർ റാഫേൽ തട്ടിൽ നാളെ യുഎഇയിൽ എത്തും. മേജർ ആർച്ച് ബിഷപ്പായി ചുമതലയേറ്റ ശേഷം ആദ്യമായാണ് യുഎഇയിൽ എത്തുന്നത്.

സായിദ് രാജ്യാന്തര വിമാനത്താവളത്തിൽ രാവിലെ 11.30ന് എത്തുന്ന അദ്ദേഹത്തെ അബുദാബി സെന്റ് ജോസഫ് കത്തീഡ്രൽ വികാരിജനറൽ ഫാ.പീറ്ററും വൈദികരും മലയാളം കോഓർഡിനേഷൻ കമ്മിറ്റി ഭാരവാഹികളും ചേർന്ന് സ്വീകരിക്കും. വൈകിട്ട് 7ന് അബുദാബി സെന്റ് ജോസഫ് കത്തീഡ്രലിൽ എത്തുന്ന മേജർ ആർച്ച് ബിഷപ്പിനെ നൂറിലേറെ പേർ പങ്കെടുക്കുന്ന മെഗാ മാർഗംകളിയോടെ സ്വീകരിച്ചാനയിക്കും. ദക്ഷിണ അറേബ്യയുടെ അപ്പോസ്തലിക് വികാരി ബിഷപ് പൗലോ മാർട്ടിനെല്ലി, ഇടവകയിലെ പുരോഹിതർ തുടങ്ങിയവർ സ്വീകരണത്തിൽ പങ്കെടുക്കും. തുടർന്ന് 7.30ന് വിശുദ്ധ കുർബാനയും രാത്രി 9ന് പൊതുസമ്മേളനവും. ബുധൻ, വ്യാഴം ദിവസങ്ങളിലെ അബുദാബി പര്യടനത്തിനു ശേഷം ദുബായിലേക്കു പോകും.