മാർ റാഫേൽ തട്ടിൽ അബുദാബിയിൽ; വരവേറ്റ് സെന്റ് ജോസഫ് കത്തീഡ്രൽ

അബുദാബി ∙ ഹ്രസ്വ സന്ദർശനത്തിന് യുഎഇയിൽ എത്തിയ സിറോ മലബാർ സഭ മേജർ ആർച്ച് ബിഷപ് മാർ റാഫേൽ തട്ടിലിന് അബുദാബി സെന്റ് ജോസഫ് കത്തീഡ്രലിൽ ഊഷ്മള സ്വീകരണം. ഇന്നലെ വൈകിട്ട് 7ന് ഒരുക്കിയ സ്വീകരണത്തിലേക്ക്  നൂറിലേറെ പേർ അണിനിരന്ന മെഗാ മാർഗംകളിയോടെ ആനയിച്ചു. ചടങ്ങിൽ ദക്ഷിണ അറേബ്യയുടെ അപ്പോസ്തലിക് വികാരി ബിഷപ് പൗലോ മാർട്ടിനെല്ലി, വികാരി ജനറൽ ഫാ. പി. എം.പീറ്റർ, ഫാ. ഡെറിക് ഡിസൂസ, ഫാ. ജോബി, യുഎഇ കത്തോലിക്കാ കോൺഗ്രസ്, യുഎഇ മലയാളം കോ ഓർഡിനേഷൻ കമ്മിറ്റി, ദുബായ് സിറോ മലബാർ കമ്യൂണിറ്റി എന്നിവയുടെ ഭാരവാഹികളും പങ്കെടുത്തു. 

തുടർന്നു നടന്ന വിശുദ്ധ കുർബാനയിലും പൊതുസമ്മേളനത്തിലും മാർ റാഫേൽ തട്ടിൽ പങ്കെടുത്തു. ഇന്ന് വൈകിട്ട് 7ന് ഷാർജ സെന്റ് മൈക്കിൾസ് പള്ളിയിൽ ഒരുക്കുന്ന സ്വീകരണത്തിലും വി.കുർബാനയിലും നാളെ ദുബായ് മെയ്ദാൻ ഹോട്ടലിൽ നടക്കുന്ന കത്തോലിക്കാ കോൺഗ്രസ് മിഡിൽ ഈസ്റ്റ് കോൺഫറൻസിലും പങ്കെടുക്കും. 30ന് ദുബായ് സെന്റ് മേരീസ് ദേവാലയത്തിൽ നടക്കുന്ന സിറോ മലബാർ ദിനാഘോഷത്തിൽ മുഖ്യാതിഥിയാകും. ഫാ. ഫ്രാൻസിസ് ഇലവത്തുങ്കൽ, ഫാ.മാത്യു തുരുത്തിപ്പള്ളി എന്നിവരും മേജർ ആർച്ച് ബിഷപ്പിനൊപ്പമുണ്ട്.