യൂത്തിനെ പിടിക്കാന്‍ ബൈഡനും ട്രംപും! വോട്ടിനോട് നോട്ടമില്ലാതെ പുതുതലമുറയും
Mail This Article
ഹൂസ്റ്റണ്‍ ∙ പ്രസിഡന്റ് പദവിയില്‍ തുടരുന്നതിന് ശ്രമിക്കുന്ന ജോ ബൈഡനും തിരിച്ചുവരവിനു ശ്രമിക്കുന്ന ഡൊണാള്‍ഡ് ട്രംപും ഇക്കുറി കിണഞ്ഞു പരിശ്രമിക്കുന്ന ഒന്നുണ്ട്, യൂത്തിന്റെ വോട്ട് എങ്ങനെ സ്വന്തം അക്കൗണ്ടില്‍ എത്തിക്കാമെന്ന്. പതിവ് നീക്കങ്ങളുമായാണ് ബൈഡന്റെ നീക്കമെങ്കില്‍ ന്യൂജനറേഷന്‍ ടൂളുകളായ ടിക് ടോക് അടക്കമുള്ള ടെക്ടനോളജിയെ ആശ്രയിച്ചാണ് ട്രംപ് മുന്നോട്ടു പോകുന്നത്. യൂണിവേഴ്‌സിറ്റികളില്‍ സന്ദര്‍ശനം നടത്തിയും വിദ്യാര്‍ഥികളുമായി ഇടപെഴകിയുമൊക്കെ ഇരുകൂട്ടരും യൂത്തിന്റെ മനംകവരാനുള്ള തീവ്രയത്‌നം തുടങ്ങിക്കഴിഞ്ഞു.
വൈസ് പ്രസിഡന്റ് കമലാ ഹാരിസ് തന്റെ ഫാള്‍ കോളജ് ടൂറിന്റെ ആദ്യ സ്റ്റോപ്പിനായി വേദിയിലെത്തുന്നതിന് വളരെ മുമ്പുതന്നെ ഹാംപ്ടണ്‍ യൂണിവേഴ്സിറ്റി ഓഡിറ്റോറിയത്തിലെ ഇടനാഴികളിലും അവരുടെ സീറ്റുകളിലും വിദ്യാർഥികള്‍ നൃത്തം ചെയ്യുകയായിരുന്നു.
ഹാരിസിനെ ചരിത്രപരമായി കറുത്തവര്‍ഗ്ഗക്കാരായ മറ്റൊരു സ്‌കൂളായ ഹോവാര്‍ഡ് യൂണിവേഴ്സിറ്റിയിലെ വിദ്യാര്‍ഥികള്‍ ഏറെ സ്‌നേഹത്തോടെയാണ് സ്വീകരിച്ചത്.
കമലയെ 'ആധികാരിക'വും തങ്ങളിലൊരാളായിട്ടുമാണ് കണ്ടതെന്ന് വിദ്യാര്‍ഥികളും കന്നി വോട്ടര്‍മാരുമായ 18 വയസ്സുള്ള ജേഡന്‍ ക്ലെമണ്‍സും ലെയ്ത്ത് കാര്‍പെന്ററും പറഞ്ഞു. എന്നാല്‍ അടുത്ത വര്‍ഷം ഹാരിസിനേയും ജോ ബൈഡനേയും പിന്തുണയ്ക്കുമെന്ന് ഉറപ്പിചു പറയാന്‍ ഇരുവരും തയാറായതുമില്ല. അവര്‍ ആദ്യമായി പ്രസിഡന്റ് തിരഞ്ഞെടുപ്പില്‍ വോട്ട് ചെയ്യാന്‍ അവകാശം നേടിയെങ്കിലും ആ വോട്ട് ആര്‍ക്കാകും എന്ന് ഇതുവരെ ഉറപ്പിച്ചിട്ടില്ല. യോഗ്യരാകും. 'ഇത് ഞങ്ങള്‍ തിരഞ്ഞെടുക്കേണ്ട ഒന്നാണെന്ന് ഞങ്ങള്‍ക്ക് തോന്നുന്നില്ല.' എന്ന മട്ടിലായിരുന്നു ഇതേക്കുറിച്ച് ഇരുവരുടെയും പ്രതികരണം.
അമേരിക്കന്‍ ചരിത്രത്തിലെ ഏറ്റവും പ്രായം കൂടിയ പ്രസിഡന്റായി ബൈഡന്‍ രണ്ടാം വട്ടം തേടുന്നതിനാല്‍ ഇവരെപ്പോലുള്ള വിദ്യാര്‍ത്ഥികളെ സൈഡ്ലൈനുകളില്‍ നിന്ന് ഒഴിവാക്കുക എന്നത് വൈറ്റ് ഹൗസിന്റെ പ്രധാന വെല്ലുവിളികളിലൊന്നാണ്. വരും ആഴ്ചകളില്‍ കാമ്പസുകള്‍ സന്ദര്‍ശിക്കുമ്പോള്‍ ഹാരിസ് അഭിമുഖീകരിക്കുന്ന വലിയൊരു വെല്ലുവിളിയും ഇതുതന്നെയാണ്.
ചെറുപ്പക്കാര്‍ ഇടത്തേക്ക് ചായുന്നുവെങ്കിലും, അവര്‍ വോട്ടുചെയ്യാനുള്ള സാധ്യത കുറവാണ് എന്നാണ് പൊതുവേ വിലയിരുത്തുന്നത്. യുവ വോട്ടര്‍മാര്‍ക്കിടയില്‍ പിന്തുണ ഉറപ്പാക്കാന്‍ ശ്രമിക്കുന്ന ഒരേയൊരു സ്ഥാനാർഥി ബൈഡന്‍ മാത്രമല്ല. വൈറ്റ് ഹൗസിലേക്കുള്ള തിരിച്ചുവരവിന്റെ ശ്രമത്തില്‍ റിപ്പബ്ലിക്കന്‍ സ്ഥാനാർഥിത്വത്തിന്റെ മുന്‍നിരക്കാരനായ മുന്‍ പ്രസിഡന്റ് ഡൊണാള്‍ഡ് ട്രംപ് കഴിഞ്ഞ വാരാന്ത്യത്തില്‍ അയോവ സ്റ്റേറ്റ് യൂണിവേഴ്സിറ്റി സന്ദര്‍ശിച്ചു.
കാര്‍ഷിക പഠന സാഹോദര്യമായ ആല്‍ഫ ഗാമാ റോയില്‍ നടന്ന ഒരു കുക്ക്ഔട്ടിനിടെ ആഹ്ലാദഭരിതരായ ജനക്കൂട്ടത്തിലേക്ക് ഓട്ടോഗ്രാഫ് എഴുതിയ ഫുട്‌ബോള്‍ എറിഞ്ഞും തുടര്‍ന്ന് ഇന്‍-സ്റ്റേറ്റ് എതിരാളിയായ അയോവ യൂണിവേഴ്‌സിറ്റിക്കെതിരായ ഫുട്‌ബോള്‍ ഗെയിമില്‍ പങ്കെടുത്തും ട്രംപ് കളം പിടിക്കാനുള്ള തീവ്രയത്‌നത്തിലാണ്. ''യുവാക്കള്‍ ട്രംപിനെ ഇഷ്ടപ്പെടുന്നുവെന്നാണ് അദ്ദേഹത്തിന്റെ മാനേജര്‍മാര്‍ വിലയിരുത്തുന്നത്. ഇത്തരം പ്രവര്‍ത്തികള്‍ അവരുടെ മനസ്സ് കീഴടക്കുമെന്നും ഇവര്‍ ചൂണ്ടിക്കാട്ടുന്നു.
മുന്‍ പ്രസിഡന്റ് സോഷ്യല്‍ മീഡിയയിലെ വിഡിയോയിലേക്ക് നയിക്കുന്ന സംഭവങ്ങളില്‍ കാണിക്കാന്‍ ശ്രമിക്കുന്നു - ഉദാഹരണത്തിന്, ജൂലൈയില്‍ ലാസ് വെഗാസില്‍ നടന്ന മിക്‌സഡ് ആയോധന കലയില്‍ ട്രംപ് പ്രത്യക്ഷപ്പെട്ടത് ഇതിന്റെ ഭാഗമായാണ്. - ട്രംപ് കാമ്പെയ്നിന്റെ മീഡിയ കണ്‍സള്‍ട്ടന്റായ ജോണ്‍ ബ്രബെന്‍ഡര്‍ പറഞ്ഞു. യൂട്യൂബും ടിക് ടോക്കും യുവാക്കള്‍ക്കുള്ള നിര്‍ണായക പ്ലാറ്റ്ഫോമുകള്‍ ആയതിനാല്‍, 'ഉള്ളടക്കം പങ്കിടുന്ന തരത്തില്‍ രസകരമായ രീതിയില്‍ സൃഷ്ടിച്ചിട്ടുണ്ടെന്ന് ഉറപ്പാക്കുകയാണ് തങ്ങളുടെ ലക്ഷ്യമെന്നും ഇവര്‍ പറുന്നു.
യുവാക്കളുടെ ശ്രദ്ധ ആകര്‍ഷിക്കുന്നത് ബുദ്ധിമുട്ടാണ്. പക്ഷേ ട്രംപിന്റെ സെലിബ്രിറ്റി ഇമേജ് അദ്ദേഹത്തിന് മേല്‍ക്കൈ നേടിക്കൊടുക്കുന്നുണ്ട്. റിപ്പബ്ലിക്കന്‍ പ്രൈമറിയെക്കുറിച്ച് ഡെസ് മോയ്നിലെ ഡ്രേക്ക് യൂണിവേഴ്സിറ്റിയിലെ സീനിയറായ 21 കാരനായ ഐസക് ഗാവിന് അറിയാവുന്ന ചുരുക്കം ചില കാര്യങ്ങളില്‍ ഒന്ന് ട്രംപ് വീണ്ടും സ്ഥാനാര്‍ത്ഥിയാകുന്നു എന്നതാണ്. അതേസമയം ട്രംപിന്റെ പ്രായം ചൂണ്ടിക്കാട്ടി അദ്ദേഹത്തിന്റെ പാര്‍ട്ടിയിലുള്ളവര്‍ തന്നെ എതിരഭിപ്രായം പ്രകടിപ്പിക്കുന്നുമുണ്ട്. ട്രംപിന് പുതിയ തലമുറയുമായി ചുവടുവെക്കാന്‍ കഴിയുമോയെന്ന് താന്‍ സംശയിക്കുന്നു എന്ന് ഈയാഴ്ച വിരമിക്കല്‍ പ്രഖ്യാപിച്ച യൂട്ടാ റിപ്പബ്ലിക്കന്‍ അംഗം സെനറ്റര്‍ മിറ്റ് റോംനി യുഎസ് ക്യാപിറ്റലില്‍ മാധ്യമപ്രവര്‍ത്തകരോട് പറഞ്ഞു,
''ഞങ്ങള്‍ ഭാവിയെക്കുറിച്ച് സംസാരിക്കുകയാണെങ്കില്‍ മാത്രമേ യുവാക്കളെ ഞങ്ങള്‍ക്ക് വോട്ടുചെയ്യാന്‍ പ്രേരിപ്പിക്കൂ. അത് ഇതുവരെ നടക്കുന്നില്ല.'- അദ്ദേഹം പറഞ്ഞു. എപി വോട്ട്കാസ്റ്റ് അനുസരിച്ച് 2020-ല്‍ 18-നും 29-നും ഇടയില്‍ പ്രായമുള്ള 61 ശതമാനം വോട്ടര്‍മാരുടെ പിന്തുണ ബൈഡന്‍ ആര്‍ജിച്ചിരുന്നു. അദ്ദേഹത്തിന്റെ വിജയത്തില്‍ യുവ വോട്ടര്‍മാര്‍ നിര്‍ണായകവുമായി. അതേസമയം ഏറ്റവും പുതിയ AP-NORC പോള്‍ പ്രകാരം അദ്ദേഹത്തിന്റെ അംഗീകാര റേറ്റിങ്ങുകള്‍ 29 ശതമാനം മാത്രമാണ്. മൊത്തം അംഗീകാരമാകട്ടെ 40 ശതമാനവും.
അമേരിക്കയിലെ യുവതീയുവാക്കള്‍ വോട്ടെടുപ്പിനോട് മുഖം തിരിച്ചു നില്‍ക്കുന്നതാണ് ഏറ്റവും പുതിയ രീതി. ഇവരെ തിരിച്ചു കൊണ്ടുവരാനുള്ള തീവ്ര യത്‌നത്തിലാണ് സര്‍ക്കാര്‍. എന്നാല്‍ യുവാക്കളുടെ വോട്ട് എങ്ങോട്ടാകും തിരിയുക എന്ന ആശങ്ക രണ്ടു പാര്‍ട്ടികള്‍ക്കും ഉണ്ടെന്നതാണ് വാസ്തവം. അത് എങ്ങനെ തിരിച്ചുപിടിക്കാമെന്നുള്ള ചര്‍ച്ചകള്‍ അണിയറയില്‍ തുടങ്ങിക്കഴിഞ്ഞു.
