ജോജി വർഗീസ് ഫൊക്കാന നാഷനൽ കമ്മിറ്റിയിലേക്ക് മത്സരിക്കുന്നു

ന്യൂയോർക്ക് ∙ ഫൊക്കാനയുടെ 2024-2026 ഭരണസമിതിയിൽ നാഷനൽ കമ്മിറ്റി മെംബെർ ആയി ഡിട്രോയ്റ്റിൽ നിന്നും കേരള ക്ലബ് ഡെട്രോയിറ്റ് മലയാളി അസോസിയേഷന്റെ പ്രവർത്തകനും  മീഡിയ പേഴ്‌സണുമായ ജോജി വർഗീസ് (ജോജി ഡിട്രോയിറ്റ്‌) മത്സരിക്കുന്നു. ഡിട്രോയിറ്റ്‌ മലയാളികൾക്കിടയിൽ എവർക്കും പ്രിയങ്കരൻ ആയ വ്യക്തിയാണ് ജോജി. സജിമോൻ നേതൃത്വം നൽകുന്ന ഡ്രീം ടീമിന്റെ ഭാഗമായാണ്  മത്സരിക്കുന്നത്. കേരള ക്ലബ് ഡിട്രോയിറ്റിന്റെ മലയാളി അസോസിയേഷന്റെ പ്രവർത്തകനായ ജോജി അസോസിയേഷന്റെ കമ്മിറ്റി മെംബർ ആയി പ്രവർത്തിച്ചിട്ടുണ്ട്.

കലാ സാംസ്‌കാരിക രംഗത്ത് തിളങ്ങി നിൽക്കുന്ന ജോജി കലയെയും കലാകാരന്മാരെയും പ്രോസ്ലാഹിപ്പിക്കുന്ന കാര്യത്തിൽ എപ്പോഴും മുൻപന്തിയിൽ നിൽക്കുന്ന വ്യക്തിയാണ്. ഡിട്രോയിറ്റിൽ നടന്ന നിരവധി സ്റ്റേജ് ഷോകളുടെ അമരത്തു പ്രവർത്തിച്ചു അത്  വിജയിപ്പിച്ചിട്ടുണ്ട്. ഒരു മീഡിയ പേഴ്‌സൺ കൂടിയാണ് ജോജി. നോർത്ത് അമേരിക്കൻ മാർത്തോമാ യുവജനസഖ്യം ഡയോസിഷ്യൻ സെക്രെട്ടറി ആയും ഡയോസിഷൻ ട്രെഷറർ ആയും പ്രവർത്തിച്ചു ഇപ്പോൾ ഭദ്രസന അസംബ്ലി അംഗമായി പ്രവർത്തിക്കുന്നു. ജനറൽ മോട്ടോഴ്സിൽ (GM) പ്രോഗ്രാമർ ആയി പ്രവർത്തിക്കുന്നു. കേരള ക്ലബ് ഡെട്രോയിറ്റിന്റെ പ്രസിഡന്റ് ഫിലോമിന സക്കറിയ  ജോജിക്ക്‌ എല്ലാ വിധ പിന്തുണയും ആശംസകളും അറിയിച്ചു.

തിരുവല്ല സ്വദേശിയായ അദ്ദേഹം ഭാര്യ സുനിത വർഗീസ് മക്കളായ നെയ്തൻ വർഗീസ് , ഇലിയാന വർഗീസ് എന്നിവരോടൊപ്പം ഡിട്രോയിറ്റിൽ ആണ് താമസം. ജോജിയുടെ സംഘടനാ മികവും നേതൃ പാടവവും യുവ നേതാകൾക്ക് മുൻതൂക്കമുള്ള ഫൊക്കാനയുടെ അടുത്ത ഭരണസമിതിയിൽ ഒരു വൻ മുതൽ കുട്ടാകും എന്ന കാര്യത്തിൽ യാതൊരു സംശയവും ഇല്ല.