ഫ്ലോറിഡയിൽ ട്രക്കും ബസ്സും കൂട്ടിയിടിച്ച് എട്ട് പേർ മരിച്ചു; ട്രക്ക് ഡ്രൈവർ അറസ്റ്റിൽ

ഡണെലൺ, ഫ്ലാ ∙ സെൻട്രൽ ഫ്ലോറിഡയിൽ കർഷകത്തൊഴിലാളികൾ സഞ്ചരിച്ച ബസുമായി കൂട്ടിയിടിച്ച്‌ അപകടത്തിൽപ്പെട്ട പിക്കപ്പ് ട്രക്കിന്റെ ഡ്രൈവറെ ഡിയുഐ ചാർജിൽ അറസ്റ്റ് ചെയ്തു. അപകടത്തിൽ എട്ട് പേർ മരിക്കുകയും എട്ട് പേർക്ക് ഗുരുതരമായി പരിക്കേൽക്കുകയും ചെയ്തതായി അധികൃതർ അറിയിച്ചു. 38 പേരെ ആശുപത്രിയിൽ പ്രവേശിപ്പിച്ചു. 

ചൊവ്വാഴ്ച രാവിലെ 6:35 ഓടെ യു.എസ്. ഹൈവേ 41-ന് കിഴക്ക് സ്റ്റേറ്റ് റോഡ് 40-ൽ ആയിരുന്നു അപകടം. അപകടസമയത്ത് തണ്ണിമത്തൻ വിളവെടുക്കുകയായിരുന്ന ഡന്നലോണിലെ കാനൺ ഫാമിലേക്ക് 46 കർഷകത്തൊഴിലാളികളെ കയറ്റിക്കൊണ്ടുപോകുകയായിരുന്നു ബസ്. ട്രക്കിന്റെ ഡ്രൈവർ ബ്രയാൻ ഹോവാർഡ് ചൊവ്വാഴ്ച ഉച്ചയ്ക്ക് രണ്ട് മണിക്ക് മുമ്പ് അറസ്റ്റിലാവുകയും ഡിയുഐ ചാർജിൽ കുറ്റാരോപണം നേരിടുകയും ചെയ്തതായി ഫ്ലോറിഡ ഡിപ്പാർട്ട്മെന്റ് ഓഫ് ഹൈവേ സേഫ്റ്റി ആൻഡ് മോട്ടോർ വെഹിക്കിൾസ് അറിയിച്ചു.