വാൻകൂവറിലെ മെഗാ തിരുവാതിരയിൽ അണിചേർന്ന് കനേഡിയന് വംശജരും
![festival-of-india-mega-thiruvathira festival-of-india-mega-thiruvathira](https://img-mm.manoramaonline.com/content/dam/mm/mo/global-malayali/us/images/2024/7/13/tiruvathira-in-canada.jpg?w=1120&h=583)
Mail This Article
വാന്കൂവര് ∙ കാനഡയിലെ വാന്കൂവര് ഐലന്ഡിൽ നടന്ന മെഗാ തിരുവാതിരയിൽ 110 യുവതികൾ പങ്കെടുത്തു. വിക്ടോറിയ ഹിന്ദു പരിഷത് ആന്ഡ് കള്ച്ചറല് സെന്റര് സംഘടിപ്പിച്ച 'ഫെസ്റ്റിവല് ഓഫ് ഇന്ത്യ' യുടെ ഭാഗമായിട്ടാണ് ഈ മെഗാ തിരുവാതിര ഐലന്ഡിലെ തിരുവാതിര സംഘടിപ്പിച്ചത്.
കനേഡിയന് വംശജരും ഇന്ത്യയുടെ പല സംസ്ഥാനങ്ങളിൽ നിന്നുള്ളവരുമാണ് മെഗാ തിരുവാതിരയിൽ ചുവട് വച്ചത്. ടീം ലീഡര്മാരുടെ നേതൃത്വത്തിൽ ഐലന്ഡിലെ വിവിധ സ്ഥലങ്ങളിൽ ടീമുകളായി തിരിഞ്ഞാണ് ഈ മഹാതിരുവാതിരയ്ക്കായി ഒരു മാസത്തിലേറെ നീണ്ടു നിന്ന പരിശീലനം നടന്നത്. നനൈമോ, ഡന്കന്, വാന്കൂവര് എന്നിവിടങ്ങളിൽ നിന്നുള്ളവരായിരുന്നു പങ്കെടുത്തവർ. 8 വയസ്സ് പ്രായമുള്ള കുട്ടികള് മുതല് മുതിർന്നവർ വരെ ഈ കൂട്ടത്തിൽ ഉണ്ടായിരുന്നു.
നര്ത്തകി ജ്യോതി വേണുവാണ് ഈ മെഗാ തിരുവാതിരയ്ക്കായി ചുവടുകള് ചിട്ടപ്പെടുത്തിയത്. മത, ഭാഷാ, പ്രാദേശിക അതിരുകളെല്ലാം മറന്ന് ഒന്നിച്ചുചേർന്ന ഈ തിരുവാതിരയ്ക്ക് വൻ പ്രതികരണമാണ് ലഭിച്ചത്.