വെർജീനിയയിൽ ഇന്ത്യൻ വംശജൻ സുഹാസ് സുബ്രമണ്യത്തിനു യുഎസ്‌ കോൺഗ്രസിലേക്ക് ചരിത്ര വിജയം

റിച്ച്‌മണ്ട്(വെർജീനിയ) ∙ വെർജീനിയയിലെ ഈസ്റ്റ് കോസ്റ്റിൽ നിന്ന് കോൺഗ്രസിലേക്ക് തിരഞ്ഞെടുക്കപ്പെട്ട ആദ്യ ഇന്ത്യൻ വംശജനായി ഡെമോക്രാറ്റ് സുഹാസ് സുബ്രഹ്മണ്യം ചരിത്രം രചിച്ചു. റിപ്പബ്ലിക്കൻ മൈക്ക് ക്ലാൻസിക്കെതിരെയായിരുന്നു സുഹാസിന്‍റെ ചരിത്ര വിജയം. 206,870 വോട്ടുകൾ (52.1%) നേടിയപ്പോൾ ക്ലാൻസിക്ക് 190,099 വോട്ടുകൾ (47.9%) ലഭിച്ചു.

സുഹാസ് സുബ്രഹ്മണ്യത്തിന്‍റെ വിജയം കോൺഗ്രസിലെ ഇന്ത്യൻ വംശജരുടെ വർധിച്ചുവരുന്ന പ്രാതിനിധ്യത്തെ  കാണിക്കുന്നു . സുഹാസ് സുബ്രഹ്മണ്യം 'സമോസ കോക്കസിലെ' ആറാമത്തെ അംഗമായി. മുൻപ് പ്രസിഡന്റ് ബരാക് ഒബാമയുടെ കീഴിൽ ടെക് പോളിസി അഡൈ്വസറായി സേവനമനുഷ്ഠിച്ച സുഹാസ് സുബ്രഹ്മണ്യം വെർജീനിയ ഹൗസിലേക്കും സെനറ്റിലേക്കും തിരഞ്ഞെടുക്കപ്പെട്ട ആദ്യ ഇന്ത്യൻ വംശജനുമായിരുന്നു.