ഇന്ത്യൻ വിദ്യാർഥികൾക്ക് ജനുവരി മുതൽ സെപ്റ്റംബർ വരെ യുഎസ് അനുവദിച്ചത് 64,008 വീസ

ന്യൂഡൽഹി ∙ ഇന്ത്യക്കാരായ വിദ്യാർഥികൾക്ക് അനുവദിച്ച യുഎസ് വീസ ഈ വർഷം ഗണ്യമായി കുറഞ്ഞു. ജനുവരി മുതൽ സെപ്റ്റംബർ വരെ 64,008 വീസയാണ് അനുവദിച്ചത്. 2023ൽ സമാന കാലയളവിൽ ഇത് 1,03,495 ആയിരുന്നു.

വിദ്യാർഥികൾക്കുള്ള എഫ്–1 വീസ 2021 ൽ സമാന കാലയളവിൽ 65,235 ആയിരുന്നു. 2022 ൽ ഇതു 93,181 ആയിരുന്നുവെന്നും രേഖകൾ വ്യക്തമാക്കുന്നു. കോവിഡ് വ്യാപിച്ച 2020 ലെ ആദ്യ 9 മാസത്തിൽ 6646 എഫ്–1 വീസയാണ് ഇന്ത്യക്കാർക്ക് അനുവദിച്ചിരുന്നത്. യുഎസിൽ ഉപരിപഠനം നടത്തുന്നവർക്കു വേണ്ടിയുള്ള നോൺ ഇമിഗ്രന്റ് വിഭാഗത്തിൽപെട്ടതാണ് എഫ്–1 വീസ.

ചൈന ഉൾപ്പെടെയുള്ള രാജ്യങ്ങളിലെ വിദ്യാർഥികൾക്ക് അനുവദിച്ച വീസയിലും കുറവുണ്ടെങ്കിലും ഇത്ര വലുതല്ല. ഈ വർഷം ആദ്യത്തെ 9 മാസത്തിൽ 73,781 എഫ്‌–1 വീസയാണു ചൈനീസ് വിദ്യാർഥികൾക്ക് അനുവദിച്ചത്. കഴിഞ്ഞ വർഷമിത് 80,603 ആയിരുന്നുവെന്നും ബ്യൂറോ ഓഫ് കോൺസുലർ അഫയേഴ്സിന്റെ വെബ്സൈറ്റിൽ വ്യക്തമാക്കുന്നു.