പകർച്ചവ്യാധികൾക്കെതിരെ മുൻകരുതലെടുക്കാം

ശുചിത്വമില്ലായ്മ, പ്രത്യേകിച്ച് പരിസര ശുചിത്വത്തിലുള്ള അലംഭാവമാണു ഡെങ്കിപ്പനി ഉൾപ്പടെയുള്ള പകർച്ചവ്യാധികളുടെ വ്യാപനത്തിന് പലപ്പോഴും ഇടയാക്കുന്നത്. 

ആഴ്ചതോറും നമ്മുടെ ചുറ്റുപാടുകൾ നിരീക്ഷിച്ചു കൊതുകു  വളരുന്ന സാഹചര്യങ്ങൾ ഇല്ലാതാക്കുന്നതിലൂടെ കൊതുകു പരത്തുന്ന രോഗങ്ങളെ തടയാൻ സാധിക്കും. ഇതിനായി സ്വീകരിക്കേണ്ട മുൻകരുതലുകൾ:

∙ കെട്ടിക്കിടക്കുന്ന വെള്ളത്തിലാണു ഡെങ്കിപ്പനി പരത്തുന്ന ഈഡിസ് കൊതുകുകൾ മുട്ടയിട്ടു പെരുകുന്നത്. അതിനാൽ ഫ്രിജിനു പിന്നിലെ ട്രേ, ചെടിച്ചട്ടികൾക്കടിയിലെ പാത്രം തുടങ്ങിയവയിലെ വെള്ളം ആഴചയിലൊരിക്കൽ മാറ്റി കൊതുകു വളരുന്നില്ലെന്ന് ഉറപ്പ് വരുത്തുക.
∙ വെള്ളം ശേഖരിക്കുന്ന പത്രങ്ങൾ, ടാങ്കുകൾ തുടങ്ങിയവ ആഴ്ചയിലൊരിക്കൽ വൃത്തിയാക്കണം. കൊതുക് കടക്കാത്ത വിധം ഇവ അടച്ചു വയ്ക്കുക. 
∙ വീടിന്റെ ടെറസും സൺഷേഡും വെള്ളം കെട്ടിനിൽക്കാത്ത വിധം പണിയുക. കെട്ടിനിൽക്കുന്നുണ്ടെങ്കിൽ ആഴ്ചയിലൊരിക്കൽ അത് ഒഴുക്കിക്കളയുക.   
∙ മാലിന്യം നീക്കേണ്ടതും ആഴ്ചയിലൊരിക്കൽ വീടിനകത്തും പരിസരത്തും സ്ഥാപനങ്ങളിലും  കൊതുകിന്റെ ഉറവിട നശീകരണം (ഡ്രൈ ഡേ ആചരണം) നടത്തുക.

വ്യക്തിശുചിത്വം
∙ തിളപ്പിച്ചാറ്റിയ വെള്ളം മാത്രം കുടിക്കുക. വൃത്തിഹീനമായ സാഹചര്യങ്ങളിൽ തയാറാക്കുന്ന ഭക്ഷണ പാനീയങ്ങൾ പലപ്പോഴും ഭക്ഷ്യ വിഷബാധയ്ക്കും വയറിളക്ക രോഗങ്ങൾ, മഞ്ഞപ്പിത്തം, ടൈഫോയ്ഡ് എന്നിവയ്ക്കും കാരണമാകുന്നു. 
∙ ശീതള പാനീയങ്ങളിൽ ചേർക്കുന്ന ഐസ് ശുദ്ധമായ വെള്ളത്തിലല്ല പലപ്പോഴും തയാറാക്കുന്നത് എന്നതിനാൽ കഴിവതും അവ കഴിക്കരുത്. 
∙ ഭക്ഷണം കഴിക്കുന്നതിന് മുൻപും പുറത്തുപോയി വരുമ്പോഴും ശൗചാലയം ഉപയോഗിച്ച ശേഷവും കൈകൾ സോപ്പുപയോഗിച്ച് നന്നായി കഴുകണം. 
∙ ചുമയ്ക്കുമ്പോൾ മൂക്കും വായും തൂവാല കൊണ്ടു മറയ്ക്കുന്നതും കൈകൾ ഇടയ്ക്കിടെ സോപ്പ് ഉപയോഗിച്ചു വൃത്തിയായി കഴുകുന്നതും വഴി വായു വഴി പകരുന്ന വൈറൽ പനി, എച്ച് വൺ എൻ വൺ  എന്നിവ ഒരു രിധി വരെ പ്രതിരോധിക്കാനാകും.