പ്രപഞ്ചത്തിനപ്പുറമുള്ള കാഴ്ചകളുമായി ചിരഞ്ജീവിയുടെ ‘വിശ്വംഭര’; ടീസർ പുറത്ത്

ചിരഞ്ജീവി നായകനായെത്തുന്ന ബിഗ് ബജറ്റ് ചിത്രം വിശ്വംഭരയുടെ ടീസർ പുറത്ത്. ദസറ ആഘോഷങ്ങളോടനുബന്ധിച്ചാണ് അണിയറപ്രവർത്തകർ ടീസർ പുറത്തിറക്കിയത്. കാഴ്ചക്കാരെ പ്രപഞ്ചത്തിനപ്പുറമുള്ള മെഗാ മാസിലേക്കു കൊണ്ടു പോകുന്ന തരത്തിലാണ് ടീസർ ഒരുക്കിയിരിക്കുന്നത്. ഒരു നിഗൂഢ ഭൂപ്രകൃതിയുടെ പശ്ചാത്തലത്തിൽ ദുഷ്ട ശക്തിയോട് ഏറ്റുമുട്ടുന്ന ചിരഞ്ജീവിയെ ടീസറിൽ കാണാനാകും.

സംവിധായകൻ വസിഷ്ഠ രചനയും സംവിധാനവും നിർവഹിക്കുന്ന ചിത്രമാണ് ‘വിശ്വംഭര’. യു വി ക്രിയേഷൻസ് ചിത്രം നിർമിക്കുന്നു. ബിംബിസാര എന്ന ബ്ലോക്ക്ബസ്റ്റർ ചിത്രം സംവിധാനം ചെയ്ത് കൊണ്ട് അരങ്ങേറ്റം കുറിച്ച വസിഷ്ഠ ഒരുക്കുന്ന വിശ്വംഭര, മികച്ച വിഎഫ്എക്സ്, വമ്പൻ ആക്‌ഷൻ രംഗങ്ങൾ എന്നിവകൊണ്ട് സമ്പന്നമായിരിക്കുമെന്നാണ് ടീസർ സൂചിപ്പിക്കുന്നത്. 

ചിരഞ്ജീവിക്കൊപ്പം തൃഷ കൃഷ്ണൻ, അഷിക രംഗനാഥ്, കുനാൽ കപൂർ, സുർഭി, ഇഷ ചൗള എന്നിവരും വിശ്വംഭരയിൽ മുഖ്യ വേഷങ്ങളിലെത്തുന്നു. ഛോട്ടാ കെ നായിഡു ആണ് ചിത്രത്തിന്റെ ഛായാഗ്രാഹകൻ. എഡിറ്റിങ്: കോട്ടഗിരി വെങ്കടേശ്വര റാവു. എം.എം.കീരവാണി സംഗീതമൊരുക്കുന്നു.