വീണ്ടും വക്കീൽ കോട്ടണിഞ്ഞ് സുരേഷ് ഗോപി; ജാനകി വെഴ്സസ് സ്റ്റേറ്റ് ഓഫ് കേരള ഉടൻ റിലീസിന്

ചിന്താമണി കൊലക്കേസിന് ശേഷം സുരേഷ് ഗോപി വീണ്ടും അഭിഭാഷക വേഷത്തിലെത്തുന്ന ജെ.എസ്.കെ അഥവാ  ജാനകി വെഴ്സസ് സ്റ്റേറ്റ് ഓഫ് കേരളയുടെ സെക്കൻഡ് ലുക്ക് പോസ്റ്ററെത്തി. സുരേഷ് ഗോപിക്കൊപ്പം അനുപമ പരമേശ്വരനാണ് മറ്റൊരു കേന്ദ്രകഥാപാത്രത്തെ സിനിമയിൽ അവതരിപ്പിക്കുന്നത്. 

‘നീതി നടപ്പിലാക്കും’ എന്ന അടിക്കുറിപ്പോടെ ചിത്രത്തിന്റെ സെക്കൻഡ് ലുക്ക് പോസ്റ്റർ സുരേഷ് ഗോപി പങ്കുവച്ചു. അധികം വൈകാതെ ചിത്രം തിയറ്ററിൽ കാണാമെന്നും സുരേഷ് ഗോപി കുറിച്ചു. ഡേവിഡ് ആബേൽ ഡൊണോവൻ എന്ന കഥാപാത്രത്തെയാണ് സുരേഷ് ഗോപി ചിത്രത്തിൽ അവതരിപ്പിക്കുന്നത്. വലിയൊരു ഇടവേളയ്ക്കു ശേഷം അനുപമ പരമേശ്വരൻ മലയാളത്തിൽ അഭിനയിക്കുന്ന ചിത്രം കൂടിയാണിത്. 

പ്രവീൺ നാരായണൻ തിരക്കഥയെഴുതി സംവിധാനം ചെയ്യുന്ന  ചിത്രത്തില്‍ മാധവ് സുരേഷ്, ശ്രുതി രാമചന്ദൻ, ദിവ്യാ പിള്ള, അസ്‌കർ അലി, ബൈജു സന്തോഷ്, യദു കൃഷ്ണൻ, രജത് മേനോൻ, അഭിഷേക് രവീന്ദ്രൻ, കോട്ടയം രമേശ്, ജയൻ ചേർത്തല എന്നിവരാണ് മറ്റു പ്രധാന അഭിനേതാക്കൾ.

കോസ്മോസ് എന്റർടൈയ്ൻമെന്റിന്റെ ബാനറിൽ നിർമ്മിക്കുന്ന ഈ ചിത്രത്തിന്റെ ഛായാഗ്രഹണം രണദിവേയാണ്. ചിത്രം വൈകാതെ റിലീസിന് എത്തുമെന്നാണ് സൂചന.