മോഹൻലാലിന്റെ ‘ബറോസി’ന് ആശംസകളുമായി അമിതാഭ് ബച്ചൻ

കാത്തിരിപ്പിനൊടുവിൽ റിലീസിനൊരുങ്ങുകയാണ് മോഹൻലാൽ ആദ്യമായി സംവിധാനം ചെയ്യുന്ന ‘ബറോസ്’. സമൂഹമാധ്യമങ്ങളിൽ നിരവധിപേരാണ് സിനിമയുടെ വിർച്വൽ ട്രെയിലറിനെ പ്രശംസിച്ച്  രംഗത്ത് എത്തുന്നത്. ഇപ്പോഴിതാ ചിത്രത്തിന്റെ ട്രെയിലർ പങ്കുവച്ച് മോഹൻലാലിനോടുള്ള സ്നേഹം അറിയിക്കുകയാണ് ബോളിവുഡിന്റെ ബിഗ് ബി സാക്ഷാൽ അമിതാഭ് ബച്ചൻ. 

തന്റെ ട്വിറ്റർ പേജിലൂടെയാണ് ബറോസിന്റെ ട്രെയിലർ അദ്ദേഹം പങ്കുവച്ചത്.  ഡിസംബർ 25ന് ക്രിസ്മസ് റിലീസ് ആയി ചിത്രം തിയറ്റുകളിലെത്തുന്നത്. ആശീർവാദ് സിനിമാസിന്റെ ഏറ്റവും വലിയ സിനിമകളിലൊന്നായ ‘ബറോസ്’ ഇന്ത്യൻ സിനിമയ്ക്കു തന്നെ മുതൽക്കൂട്ടാകുമെന്നാണ് പ്രേക്ഷകർ കരുതുന്നത്.

ഇന്ത്യയിലെ ആദ്യ ത്രീഡി ചിത്രമായ 'മൈ ഡിയര്‍ കുട്ടിച്ചാത്തന്‍' സംവിധാനം ചെയ്ത ജിജോ പുന്നൂസിന്റെ കഥയെ ആസ്പദമാക്കിയാണ് മോഹന്‍ലാല്‍ ബറോസ് ഒരുക്കുന്നത്. ഗുരു സോമസുന്ദരം, മോഹന്‍ ശര്‍മ, തുഹിന്‍ മേനോന്‍ എന്നിവര്‍ക്കൊപ്പം വിദേശ താരങ്ങളായ മായാ, സീസര്‍, ലോറന്റെ തുടങ്ങിയവരും ബറോസില്‍ അഭിനയിച്ചിട്ടുണ്ട്. അഞ്ച് വര്‍ഷത്തെ കാത്തിരിപ്പിനൊടുവിലാണ് ബറോസ് റിലീസിനൊരുങ്ങുന്നത്