ജൈവ ഇന്ധന എൻജിൻ 6 മാസത്തിനകം: കാർ കമ്പനികൾക്കു നിർദേശം
![car-engine car-engine](https://img-mm.manoramaonline.com/content/dam/mm/mo/news/business/images/2021/12/24/car-engine.jpg?w=1120&h=583)
Mail This Article
കൊച്ചി∙ പെട്രോളിനൊപ്പം എഥനോൾ, മെഥനോൾ തുടങ്ങിയ ജൈവ ഇന്ധനങ്ങളും ഉപയോഗിക്കാവുന്ന ഫ്ലെക്സിബിൾ ഫ്യുവൽ എൻജിനുകൾ ആറുമാസത്തിനകം ആവിഷ്കരിക്കണമെന്ന് കാർ കമ്പനികൾക്കു കേന്ദ്ര നിർദേശം. കഴിഞ്ഞ ദിവസം ഫയൽ ഒപ്പുവച്ചതായി കേന്ദ്ര മന്ത്രി നിതിൻ ഗഡ്കരി വെളിപ്പെടുത്തി. നിലവിൽ 10% എഥനോൾ പെട്രോളിൽ മിക്സ് ചെയ്ത് ഉപയോഗിക്കുന്നുണ്ട്. എന്നാൽ ഇതിലുമേറെ എഥനോൾ ചേർത്താൽ നിലവിലുള്ള എൻജിനുകളിൽ ഉപയോഗിക്കാനാകില്ല.
പെട്രോളിന്റെ ഉപയോഗം കുറയ്ക്കാൻ, രാജ്യത്തു കരിമ്പിൽനിന്ന് ധാരാളമായി ഉൽപാദിപ്പിക്കാനാകുന്ന എഥനോൾ ഉപയോഗം കൂട്ടണമെന്നതാണു സർക്കാരിന്റെ നിലപാട്. ഇതിന് ഫ്ലെക്സ്–എൻജിനുകൾ വേണ്ടിവരും. എഥനോൾ 20% ആയി ഉടൻതന്നെ ഉയർത്താനാണ് തീരുമാനം. ബ്രസീലിൽ വ്യാപകമായി ഫ്ലെക്സി ഫ്യുവൽ വാഹനങ്ങൾ ഓടുന്നുണ്ട്. ടിവിഎസ്, ബജാജ് ഓട്ടോ എന്നിവർ എഥനോൾ മാത്രമുപയോഗിച്ച് പ്രവർത്തിക്കുന്ന 2 വീലർ, 3 വീലർ എൻജിനുകൾ രൂപപ്പെടുത്തിയിട്ടുണ്ടെന്നും മന്ത്രി പറഞ്ഞു.
English Summary: Coming up, an order directing car brands to make flex-fuel engines, says Gadkari