കോഡിയാക്കിന് ജനപ്രീതി ; ഇറക്കുമതി കൂട്ടുന്നു

ഘടകങ്ങൾ പൂർണമായും ഇറക്കുമതി ചെയ്ത് ഇന്ത്യയിൽ അസംബിൾ ചെയ്തു വിൽക്കുന്ന പ്രീമിയം 7-സീറ്റർ എസ്‌യുവി കോഡിയാക്കിന് സ്കോഡ പ്രതീക്ഷിച്ചതിനെക്കാൾ ഡിമാൻഡ്. കഴിഞ്ഞവർഷം ഇന്ത്യയ്ക്കായി നീക്കിവച്ച 1200 കോഡിയാക്കിനും 24 മണിക്കൂറിനകം ബുക്കിങ് ലഭിച്ചതിനാൽ ഇക്കൊല്ലം 3000 കോഡിയാക്ക് കിറ്റുകൾ എത്തിച്ച് അസംബിൾ ചെയ്തു വിൽക്കാനാണ് കമ്പനിയുടെ തീരുമാനം. ഏറ്റവും പുതിയ ബിഎസ് - 6 വ്യവസ്ഥകൾ പാലിക്കുന്ന മോഡലാണ് പുതിയ കോഡിയാക്ക്. 190 എച്ച്പി കരുത്തുള്ള 2- ലീറ്റർ ടർബോ പെട്രോൾ എൻജിനും 7-സ്പീഡ് ഡ്യൂവൽ ക്ലച്ച് ഓട്ടമാറ്റിക് ഗിയർ സംവിധാനവുമാണുള്ളത്. ഫോർ വീൽ ഡ്രൈവ് സൗകര്യമുണ്ട്. 37.99 ലക്ഷം രൂപ മുതൽ 41.39 ലക്ഷം രൂപ വരെയാണ് ഷോറൂംവില. 9 എയർബാഗുകൾ വരെയുള്ള സുരക്ഷാ സജ്ജീകരണങ്ങളുണ്ട്.