ഗവ. ഐടി പാർക്കുകളിലെ സ്പേസ് മാർക്കറ്റിങ്: സ്ഥലം കിട്ടാതെ ഒട്ടേറെ കമ്പനികൾ
![it-park it-park](https://img-mm.manoramaonline.com/content/dam/mm/mo/news/business/images/2022/6/22/it-park.jpg?w=1120&h=583)
Mail This Article
തിരുവനന്തപുരം ∙ ഗവ. ഐടി പാർക്കുകളിൽ ഒഴിഞ്ഞ സ്ഥലങ്ങളുടെ മാർക്കറ്റിങ്ങിനായി ഇന്റർനാഷനൽ പ്രോപ്പർട്ടി കൺസൽറ്റന്റ്സിനെ സർക്കാർ നിയമിക്കാനിരിക്കെ പാർക്കുകളിൽ സ്ഥലം ലഭിക്കാൻ അപേക്ഷ നൽകി കാത്തിരിക്കുന്നത് ഒട്ടേറെ കമ്പനികൾ. തിരുവനന്തപുരം ടെക്നോപാർക്ക്, എറണാകുളം ഇൻഫോപാർക്ക് എന്നിവയുടെ വെബ്സൈറ്റിൽ നിന്നു ലഭ്യമായ കണക്കനുസരിച്ച് 2015 മുതൽ അപേക്ഷ സമർപ്പിച്ച 575 കമ്പനികൾക്ക് ഇനിയും സ്ഥലം അനുവദിച്ചിട്ടില്ല.
ടെക്നോപാർക്കിൽ 458 കമ്പനികളാണ് അനുമതിക്കായി കാത്തിരിക്കുന്നത്. ഫെയ്സ് ഒന്നിൽ 186, ഫെയ്സ് മൂന്നിൽ 260, ടെക്നോസിറ്റിയിൽ 12 എന്നിങ്ങനെ അപേക്ഷകൾക്ക് അനുമതി ലഭിച്ചിട്ടില്ല. ഇതിൽ 10,000 ചതുരശ്ര അടിക്കു മുകളിൽ ബിൽഡ് അപ് സ്പേസ് ആവശ്യപ്പെട്ടിട്ടുള്ള 22 കമ്പനികളുണ്ട്. തിരുവനന്തപുരം ഹബ്ബിന്റെ കീഴിൽ വരുന്ന കൊല്ലം സാറ്റലൈറ്റ് ക്യാംപസിൽ അനുമതി ലഭിക്കാത്ത 11 കമ്പനികളുണ്ട്. എറണാകുളം ടെക്നോപാർക്ക്, സാറ്റലൈറ്റ് ക്യാംപസുകളായ തൃശൂർ കൊരട്ടി, ആലപ്പുഴ ചേർത്തല എന്നിവിടങ്ങളിലായി 106 കമ്പനികളും. കോഴിക്കോട് സൈബർ പാർക്കിലും അപേക്ഷകൾ പൂർണമായി പരിഗണിച്ചിട്ടില്ല.
2021 ഏപ്രിൽ 1 മുതൽ ടെക്നോപാർക്കിൽ ബിൽഡ് അപ് സ്പേസിനായി എത്തിയ 386 കമ്പനികളുടെ അപേക്ഷ നിരസിച്ചിട്ടുണ്ട്. ഈ കാലഘട്ടത്തിൽ 92 കമ്പനികൾക്കു മാത്രമാണ് അനുമതി നൽകിയത്. മികച്ച കമ്പനികളെ ഐടി പാർക്കുകളിൽ എത്തിക്കുകയെന്ന ലക്ഷ്യത്തോടെയാണ് ഇന്റർനാഷനൽ പ്രോപ്പർട്ടി കൺസൽറ്റന്റ്സിനെ നിയമിക്കാനുള്ള ഉത്തരവിനു കഴിഞ്ഞ ദിവസം മന്ത്രിസഭായോഗം അനുമതി നൽകിയത്. നിലവിൽ വിവിധ ഐടി പാർക്കുകളിലായി ഏകദേശം 1000 ഏക്കർ ഭൂമിയും 20 ദശലക്ഷം ചതുരശ്ര അടി ബിൽഡ് അപ് സ്പേസും ഒഴിഞ്ഞു കിടക്കുന്നുണ്ട്.