മണിപ്പുരിൽ രാഹുലിന്റെ പ്രചാരണം; ഇന്ന് മോദി, നാളെ ഷാ

ഇംഫാൽ ∙ ബിജെപിയും ആർഎസ്എസും മണിപ്പുരിൽ എത്തിയത് അധികാരികളെപ്പോലെയാണെന്നു കോൺഗ്രസ് നേതാവ് രാഹുൽ ഗാന്ധി. മണിപ്പുരിന്റെ സംസ്കാരത്തെയും ഭാഷയെയും ജനാധിപത്യമൂല്യങ്ങളയും നശിപ്പിക്കുകയാണ് ബിജെപി എന്ന് ഇംഫാലിൽ കോൺഗ്രസ് റാലിയിൽ രാഹുൽ പറഞ്ഞു. ആയിരങ്ങൾ പങ്കെടുത്ത റാലി കോൺഗ്രസിന്റെ ശക്തിപ്രകടനം കൂടിയായി. കഴിഞ്ഞ നിയമസഭാ തിരഞ്ഞെടുപ്പിൽ ഏറ്റവും വലിയ ഒറ്റക്കക്ഷിയായിട്ടും സർക്കാർ രൂപീകരിക്കാൻ കോൺഗ്രസിനു സാധിച്ചിരുന്നില്ല.

ഒരു ദിവസത്തെ സന്ദർശനത്തിനെത്തിയ രാഹുൽ ശഹീദ് മിനാറും നുപിലാൽ കോംപ്ലക്സും സന്ദർശിച്ച് സ്വാതന്ത്ര്യസമര സേനാനികൾക്ക് ആദരാഞ്ജലികളർപ്പിച്ചു. കോൺഗ്രസ് നേതൃത്വത്തിലുള്ള പുരോഗമന മതനിരപേക്ഷ സഖ്യത്തിന്റെ നേതാക്കളുമായി അദ്ദേഹം ചർച്ച നടത്തി. ഇന്നു ബിജെപിക്കു വേണ്ടി പ്രധാനമന്ത്രി നരേന്ദ്ര മോദിയും നാളെ ആഭ്യന്തരമന്ത്രി അമിത് ഷായും പ്രചാരണം നടത്തും. 

Content Highlight: Manipur Assembly Elections 2022