നെയിം പ്ലേറ്റിൽ ‘ഭാരത്’; പ്രഖ്യാപനത്തിൽ ‘ഇന്ത്യ’

ന്യൂഡൽഹി ∙ ഉച്ചകോടിയിൽ ‘ഭാരത്’ എന്നെഴുതിയ നെയിം പ്ലേറ്റാണ് പ്രധാനമന്ത്രി നരേന്ദ്ര മോദി ഉപയോഗിച്ചത്. കഴിഞ്ഞ വർഷത്തെ ബാലി ഉച്ചകോടിയിൽ ‘ഇന്ത്യ’ എന്ന പേരാണ് ഉപയോഗിച്ചിരുന്നത്. ജി20 രാജ്യാന്തര മീഡിയ സെന്ററിലുണ്ടായിരുന്ന ഉദ്യോഗസ്ഥരുടെ ബാഡ്ജിൽ ‘ഭാരത് ഒഫീഷ്യൽ’ എന്നാണു രേഖപ്പെടുത്തിയിരുന്നത്. അതേസമയം, സംയുക്ത പ്രസ്താവനയിലടക്കം ഇന്ത്യ എന്നു തന്നെയാണുള്ളത്.

ഉച്ചകോടിയുടെ വേദിയായ പ്രഗതി മൈതാനത്ത് ‘ജി20 ഇന്ത്യ’ എന്ന ഹോർഡിങ്ങുകളും കട്ടൗട്ടുകളുമുണ്ടായിരുന്നു. ജി20 നേതാക്കൾക്കുള്ള അത്താഴവിരുന്നിലേക്ക് ‘രാഷ്ട്രപതി ഓഫ് ഭാരത്’ എന്ന് രേഖപ്പെടുത്തിയ ക്ഷണക്കത്ത് നൽകിയതോടെയാണ് പേരു സംബന്ധിച്ച വിവാദം തുടങ്ങിയത്.

English Summary: 'Bharat' on name plate; 'India' in declaration at G20 summit 2023