കോൺഗ്രസിനെ പിന്തുണയ്ക്കും: വൈ.എസ്.ഷർമിള

ഹൈദരാബാദ് ∙ ആന്ധ്രപ്രദേശ് മുൻമുഖ്യമന്ത്രി വൈ.എസ്.രാജശേഖര റെഡ്ഡിയുടെ മകൾ വൈ.എസ്.ഷർമിളയുടെ വൈഎസ്ആർ തെലങ്കാന പാർട്ടി നിയമസഭാ തിരഞ്ഞെടുപ്പിൽ കോൺഗ്രസിനെ പിന്തുണയ്ക്കും. സംസ്ഥാനത്തു മുഴുവൻ മണ്ഡലങ്ങളിലും സ്ഥാനാർഥിയെ നിർത്താനുള്ള തീരുമാനം അവർ പിൻവലിച്ചു. താനുൾപ്പെടെ മത്സരിക്കില്ലെന്നും എല്ലായിടത്തും കോൺഗ്രസിനെ പിന്തുണയ്ക്കുമെന്നും ഷർമിള വ്യക്തമാക്കി. ബിആർഎസിനെതിരെ ഭരണവിരുദ്ധ വോട്ടുകൾ ഭിന്നിക്കാതിരിക്കാനാണു തീരുമാനം. കോൺഗ്രസ് നേതാക്കൾ തനിക്ക് അന്യരല്ലെന്നും വൈഎസ്ആറിന്റെ മകളെന്ന പരിഗണന സോണിയ ഗാന്ധിയും രാഹുലും എപ്പോഴും നൽകിയിട്ടുണ്ടെന്നും ഷർമിള പറഞ്ഞു. 

കോൺഗ്രസുമായി സഹകരിക്കുമെന്ന് പ്രഖ്യാപിച്ചു 4 മാസം കാത്തിരുന്നിട്ടും തീരുമാനമില്ലാത്തതിനാൽ എല്ലാ സീറ്റിലും ഒറ്റയ്ക്കു മത്സരിക്കുമെന്നു ഷർമിള നേരത്തേ പ്രഖ്യാപിച്ചിരുന്നു. ദേശീയനേതൃത്വം താൽപര്യപ്പെട്ടെങ്കിലും കോൺഗ്രസ് സംസ്ഥാനഘടകം അനുകൂലമല്ലാത്തതിനാലാണു സഖ്യം നടക്കാതെ പോയത്. കർണാടക ഉപമുഖ്യമന്ത്രി ഡി.കെ.ശിവകുമാർ വഴി കേന്ദ്രനേതൃത്വം വീണ്ടും ആശയവിനിമയം നടത്തിയെന്നാണ് വിവരം.