ദേശീയപാത വികസനം: പദ്ധതി രേഖയിൽ ഇനി മുതൽ 3 അലൈൻമെന്റുകൾ

ന്യൂഡൽഹി ∙ ദേശീയപാത വികസനത്തിനു സ്ഥലമേറ്റെടുക്കുമ്പോൾ ഇനിമുതൽ നിർദിഷ്ട പദ്ധതിക്ക് 3 അലൈൻമെന്റുകൾ തയാറാക്കാൻ ദേശീയപാതാ അതോറിറ്റി ആലോചിക്കുന്നു. ഈ അലൈൻമെന്റുകളിൽ പെടുന്ന സ്ഥലങ്ങളുടെ വിൽപനയും തരംമാറ്റലും തടയാൻ സംസ്ഥാനങ്ങളോടു നിർദേശിക്കാനും ആലോചനയുണ്ട്. സ്ഥലമേറ്റെടുക്കൽ മാനദണ്ഡങ്ങൾ പരിഷ്കരിക്കുന്നതിന് തയാറാക്കുന്ന കരടു റിപ്പോർട്ടിലായിരിക്കും ഈ നിർദേശങ്ങളുണ്ടാവുക.

 പലയിടത്തും സ്ഥലമേറ്റെടുക്കുമ്പോൾ ഉയർന്ന നഷ്ടപരിഹാരം ചോദിച്ച് പദ്ധതികൾ നീണ്ടുപോകുന്ന സാഹചര്യമുണ്ട്. കേരളം പോലെ ജനവാസം കൂടിയ പ്രദേശങ്ങളിൽ ഭൂമി വില കൂടുതലാണെന്ന് ഗതാഗതമന്ത്രി നിതിൻ ഗഡ്കരി പറഞ്ഞിരുന്നു. ഇനി മുതൽ ഏതെങ്കിലും പദ്ധതി നടപ്പാക്കാനുദ്ദേശിക്കുമ്പോൾ അതിന്റെ 3 അലൈൻമെന്റുകൾ ഉൾപ്പെട്ട വിശദ പദ്ധതിരേഖ തയാറാക്കും. ഇത് ഗതിശക്തി പോർട്ടലിൽ അപ്‌ലോഡ് ചെയ്യും.

ഗതിശക്തിയിലുള്ള മറ്റു 16 വകുപ്പുകളുടെ ഏതെങ്കിലും പ്രധാന പദ്ധതികളോ നിർമാണങ്ങളോ ഈ അലൈൻമെന്റിൽ ഉൾപ്പെടുന്നുണ്ടോയെന്നും മറ്റും നോക്കാനാണിത്. അതേ സമയം 3 അലൈൻമെന്റുകളിലുമുൾപ്പെടുന്ന ഭൂമിയുടെ ക്രയവിക്രയവും തരംമാറ്റലും തടയാൻ അതതു പ്രാദേശിക ഭരണകൂടങ്ങളോടു നിർദേശിക്കുകയും ചെയ്യും. 3 അലൈൻമെന്റുകളും വരുന്ന മേഖലയുടെ പുതുക്കിയ റവന്യു മാപ്പും തയാറാക്കും. എല്ലാവർഷവും ജൂൺ 30നുള്ളിലോ അല്ലെങ്കിൽ പദ്ധതി പ്രഖ്യാപിച്ച് 3 മാസത്തിനുള്ളിലോ ഏറ്റെടുക്കേണ്ട ഭൂമി, നഷ്ടപരിഹാരം തുടങ്ങിയവയിൽ തീരുമാനമുണ്ടാക്കാനും നിർദേശമുണ്ട്.