സുധാ മൂർത്തി രാജ്യസഭയിലേക്ക്

ന്യൂഡൽഹി ∙ ഇൻഫോസിസ് ഫൗണ്ടേഷൻ മുൻ അധ്യക്ഷയും സാമൂഹിക പ്രവർത്തകയും എഴുത്തുകാരിയുമായ സുധാ മൂർത്തിയെ (74) രാജ്യസഭയിലേക്ക് രാഷ്ട്രപതി നാമനിർദേശം ചെയ്തു. പ്രധാനമന്ത്രി നരേന്ദ്രമോദിയാണ് ഇക്കാര്യം അറിയിച്ചത്. 

ഇൻഫോസിസ് സ്ഥാപക ചെയർമാൻ എൻ.ആർ.നാരായണ മൂർത്തിയുടെ ഭാര്യയും ബ്രിട്ടിഷ് പ്രധാനമന്ത്രി ഋഷി സുനകിന്റെ ഭാര്യാമാതാവുമാണ്. രാജ്യാന്തര വനിതാ ദിനത്തിൽ തന്നെ ജനങ്ങളെ സേവിക്കാൻ അവസരം ലഭിച്ചത് ഇരട്ടി സന്തോഷം പകരുന്നതായി സുധാ മൂർത്തി പറഞ്ഞു. രാജ്യസഭയിലെ സുധയുടെ സാന്നിധ്യം സ്ത്രീശക്തിയുടെ തെളിവാണെന്ന് നാരായണ മൂർത്തി പറഞ്ഞു. 2023ൽ സുധയ്ക്ക് പത്മഭൂഷൺ ബഹുമതി ലഭിച്ചിരുന്നു.

മക്കൾ: റോഹൻ മൂർത്തി, ബ്രിട്ടിഷ് പ്രധാനമന്ത്രി ഋഷി സുനകിന്റെ ഭാര്യ അക്ഷത മൂർത്തി.