അറസ്റ്റിന് കാരണം നൽകിയേ തീരൂ; ഹർജി തള്ളി

ന്യൂഡൽഹി ∙ എ‍ൻഫോഴ്സ്മെന്റ് ഡയറക്ടറേറ്റ് (ഇ.ഡി) അറസ്റ്റിനുള്ള കാരണങ്ങൾ പ്രതിക്കു രേഖാമൂലം നൽകിയിരിക്കണമെന്ന വിധിക്കെതിരായ (പങ്കജ് ബൻസൽ കേസ്) പുനഃപരിശോധനാ ഹർജി സുപ്രീം കോടതി തള്ളി. ഉത്തരവിൽ പിഴവുകളില്ലെന്നു ജഡ്ജിമാരായ എ.എസ്.ബൊപ്പണ്ണ, പി.വി.സഞ്ജയ് കുമാർ എന്നിവരുടെ ബെ‌‍ഞ്ച് വ്യക്തമാക്കി.

കള്ളപ്പണം വെളുപ്പിക്കൽ നിയമം (പിഎംഎൽഎ) ചൂണ്ടിക്കാട്ടി തന്നിഷ്ടപ്രകാരം ഇ.ഡിക്ക് ആളെ അറസ്റ്റ് ചെയ്യാനാകില്ലെന്നും നീതിപൂർവകമായ നടപടിയാണ് ഉണ്ടാകേണ്ടെന്നും ഒക്ടോബറിലെ വിധിയിൽ കോടതി വ്യക്തമാക്കിയിരുന്നു. ഇ.ഡിയുടെ അറസ്റ്റ് നടപടിക്കെതിരെ റിയൽ എസ്റ്റേറ്റ് ഉടമകളായ പങ്കജ് ബൻസലിന്റെയും ബസന്ത് ബൻസലിന്റെയും ഹർജികളിലായിരുന്നു അത്.