ദക്ഷിണേന്ത്യ: കോൺഗ്രസ് ലക്ഷ്യം 56 സീറ്റ്; കേരളത്തിനു പുറമേ കർണാടകയിലും തെലങ്കാനയിലും പ്രതീക്ഷ

ന്യൂഡൽഹി ∙ ലോക്സഭാ തിരഞ്ഞെടുപ്പിൽ കഴിഞ്ഞതവണ മൊത്തം നേടിയതിനെക്കാൾ കൂടുതൽ സീറ്റ് ഇത്തവണ ദക്ഷിണേന്ത്യയിൽനിന്നു മാത്രം നേടാൻ കോൺഗ്രസ് ലക്ഷ്യമിടുന്നു. ബിജെപിയെക്കാൾ ബഹുദൂരം മുന്നേറാമെന്നു കരുതുന്ന മേഖലയിൽ 56 സീറ്റാണ് പാർട്ടിയുടെ ലക്ഷ്യം. 2019 ൽ രാജ്യത്താകെ 52 സീറ്റാണു കോൺഗ്രസ് നേടിയത്.

കേരളം, തമിഴ്നാട്, കർണാടക, തെലങ്കാന, ആന്ധ്ര, ഗോവ, പുതുച്ചേരി എന്നിവിടങ്ങളിലെ 132 സീറ്റിൽ 28 എണ്ണം മാത്രമാണു കഴിഞ്ഞതവണ കോൺഗ്രസ് ജയിച്ചത്. ഇതിന്റെ ഇരട്ടി നേടാനായി വിവിധ സംസ്ഥാനങ്ങളിലെ കണക്കുകൂട്ടലിങ്ങനെ:

∙ കേരളം: കോൺഗ്രസ് മത്സരിക്കുന്ന 16 സീറ്റും ആഞ്ഞുപിടിച്ചാൽ ജയിക്കാമെന്നാണു പ്രതീക്ഷ.

∙ കർണാടക: 28 സീറ്റിൽ 20 വരെ നേടാമെന്നാണു സംസ്ഥാന നേതൃത്വത്തിന്റെ അവകാശവാദമെങ്കിലും യാഥാർഥ്യബോധത്തോടെ 12–15 സീറ്റ് കണക്കാക്കിയാൽ മതിയെന്നാണു ഹൈക്കമാൻഡിന്റെ നിലപാട്. കഴിഞ്ഞതവണ ഒരു സീറ്റാണുണ്ടായിരുന്നത്.

∙ തെലങ്കാന: 2019 ൽ 17ൽ 3 സീറ്റ് മാത്രമായിരുന്നു. ഇത്തവണ 10– 12 സീറ്റ് പ്രതീക്ഷിക്കുന്നു.

∙ തമിഴ്നാട്, പുതുച്ചേരി: ഡിഎംകെയുമായി സഖ്യത്തിൽ മത്സരിക്കുന്ന 10 സീറ്റും നേടാമെന്നു കണക്കുകൂട്ടൽ.

∙ ആന്ധ്രപ്രദേശ്: പിസിസി പ്രസിഡന്റ് വൈ.എസ്.ഷർമിളയുടെ പ്രതിച്ഛായയിൽ 1– 2 സീറ്റ് ലഭിച്ചേക്കാമെന്നാണു കണക്കുകൂട്ടൽ. ഷർമിള ചുമതലയേറ്റത് ഏതാനും മാസം മുൻപു മാത്രമാണെന്നതിനാൽ, വലിയ അദ്ഭുതങ്ങൾ പ്രതീക്ഷിക്കുന്നില്ല.

∙ ഗോവ: കഴിഞ്ഞതവണ നേടിയ ഒരു സീറ്റ് നിലനിർത്താമെന്നു പ്രതീക്ഷ.