പാർശ്വഫലം മുലപ്പാലിലും? കുഞ്ഞുങ്ങളിൽ നിരീക്ഷണം; വാക്സീൻ ജാഗ്രതയ്ക്ക് മാർഗരേഖ വരുന്നു

ന്യൂഡൽഹി ∙ മുലപ്പാൽ സ്വീകരിച്ചതിനു പിന്നാലെ നവജാത ശിശുക്കളിൽ അസ്വാഭാവിക പാർശ്വ,വിപരീത ഫലങ്ങൾ കണ്ടാൽ അക്കാര്യം റിപ്പോർട്ട് ചെയ്യണമെന്നതടക്കം നിർദേശങ്ങളുമായി ‘വാക്സീൻ ജാഗ്രതയ്ക്ക്’ മാർഗരേഖ വരുന്നു. അമ്മ സ്വീകരിച്ച വാക്സീനിന്റേതെന്നു കരുതാവുന്ന വിപരീത ഫലമാണോ കാരണമെന്നു പരിശോധിക്കാൻ ഉദ്ദേശിച്ചുള്ളതാണ് സെൻട്രൽ ഡ്രഗ്സ് സ്റ്റാൻഡേർഡ് കൺട്രോൾ ഓർഗനൈസേഷന്റെ (സിഡിഎസ്‌സിഒ) മാർഗരേഖ.

വിജ്ഞാപനത്തിനുള്ള നടപടി അന്തിമഘട്ടത്തിലാണ്. പരീക്ഷണ വാക്സീനുകൾ ഗർഭിണികൾക്കു നൽകുമ്പോൾ വിപരീതഫലം പ്രകടമാക്കുന്നില്ലെങ്കിലും അവയുടെ സ്വാധീനം രേഖപ്പെടുത്തേണ്ടതുണ്ടെന്നും പരമാവധി വിവരങ്ങൾ ചേർത്തിരിക്കണമെന്നും നിർദേശമുണ്ട്. 

ഗുരുതരസ്വഭാവമുള്ള എല്ലാ പാർശ്വഫലവും 15 ദിവസത്തിനകം ലൈസൻസിങ് അതോറിറ്റിക്കു റിപ്പോർട്ട് ചെയ്യണം. സംസ്ഥാന മരുന്നു നിയന്ത്രണ വകുപ്പു ചുമതലപ്പെടുത്തുന്ന ഡ്രഗ് ഇൻസ്പെക്ടർമാരാണ് സംശയത്തിലുള്ള വാക്സീൻ സാംപിൾ ശേഖരിച്ചു കസൗളിയിലെ സെൻട്രൽ ഡ്രഗ്സ് ലബോറട്ടറിയിൽ അയച്ചു പരിശോധന നടത്തേണ്ടത്. ചുമതലപ്പെട്ട ഫാർമക്കോ വിജിലൻസ് ഓഫിസർമാർ വാക്സീൻ ഉൽപാദക–ഇറക്കുമതി കമ്പനികളിൽ വേണമെന്നും സിഡിഎസ്‌സിഒ നിർദേശിക്കുന്നു.