പന്നു വധശ്രമക്കേസ്: ഇന്ത്യയുടെ സഹകരണം തൃപ്തികരമെന്ന് യുഎസ്

വാഷിങ്ടൻ ∙ യുഎസ് പൗരനായ സിഖ് വിഘടനവാദി നേതാവ് ഗുട്പട്‍വന്ത് സിങ് പന്നുവിനെ വധിക്കാൻ ശ്രമിച്ച കേസിൽ ഇന്ത്യയ്ക്കു പങ്കുണ്ടെന്ന ആരോപണത്തിൽ അന്വേഷണം നടത്തുന്ന ഇന്ത്യൻ സമിതി സ്റ്റേറ്റ് ഡിപ്പാർട്മെന്റ് ഉദ്യോഗസ്ഥരുമായി കൂടിക്കാഴ്ച നടത്തി.

അന്വേഷണത്തിൽ ഇന്ത്യയുടെ സഹകരണം തൃപ്തികരവും പ്രയോജനപ്രദവുമാണെന്ന് സ്റ്റേറ്റ് ഡിപ്പാർട്മെന്റ് വക്താവ് മാത്യു മില്ലർ അറിയിച്ചു. പന്നു വധശ്രമക്കേസിൽ പങ്കുണ്ടെന്ന് യുഎസ് ആരോപിക്കുന്ന ഇന്ത്യൻ പൗരൻ നിഖിൽ ഗുപ്ത സർക്കാരിനായി ജോലി ചെയ്യുന്നില്ലെന്ന് വ്യക്തമാക്കിയതായും അദ്ദേഹം പറഞ്ഞു.