നായിഡുവിനെ മുൻപ് അറസ്റ്റ് ചെയ്ത സിഐഡി മേധാവിക്ക് സസ്പെൻഷൻ

അമരാവതി ∙ ആന്ധ്രപ്രദേശ് മുഖ്യമന്ത്രി എൻ. ചന്ദ്രബാബു നായിഡുവിന്റെ അറസ്റ്റിനു നേതൃത്വം നൽകിയ മുതിർന്ന ഐപിഎസ് ഓഫിസർ എൻ. സഞ്ജയിനെ സർക്കാർ സസ്പെൻഡ് ചെയ്തു. ചന്ദ്രബാബു നായിഡു അധികാരത്തിലെത്തിയ ശേഷം സസ്പെൻഡ് ചെയ്യുന്ന നാലാമത്തെ ഐപിഎസ് ഓഫിസറാണ്. 

നൈപുണ്യ വികസന കോർപറേഷൻ ഫണ്ടുകളിൽ 371 കോടിയുടെ ക്രമക്കേട് നടത്തിയെന്നാരോപിച്ചാണ് കഴിഞ്ഞ വർഷം സെപ്റ്റംബറിൽ സിഐഡി മേധാവിയായിരുന്ന എൻ. സഞ്ജയിന്റെ നേതൃത്വത്തിൽ നായിഡുവിനെ അറസ്റ്റ് ചെയ്തത്. 

ഫയർ സർവീസ് ഡയറക്ടർ ജനറലായിരുന്ന കാലത്ത് ലാപ്ടോപ്പുകളും ഐപാഡുകളും വാങ്ങിയതിൽ ധനദുർവിനിയോഗം ആരോപിച്ചാണ് സസ്പെൻഷൻ. ഇതേക്കുറിച്ചു വിജിലൻസ് അന്വേഷിച്ചിരുന്നു.