പ്രധാനമന്ത്രിയുടെ കുവൈത്ത് സന്ദർശനം നാളെയും മറ്റന്നാളും

ന്യൂഡൽഹി ∙ പ്രധാനമന്ത്രി നരേന്ദ്ര മോദി 21, 22 തീയതികളിൽ കുവൈത്ത് സന്ദർശിക്കും. 43 വർഷത്തിനു ശേഷമാണ് ഇന്ത്യൻ പ്രധാനമന്ത്രി കുവൈത്ത് സന്ദർശിക്കുന്നത്. കുവൈത്ത് അമീർ ഷെയ്ഖ് മിഷാൽ അൽ അഹമ്മദ് അൽ ജാബർ അൽ സബാഹിന്റെ ക്ഷണം സ്വീകരിച്ചെത്തുന്ന പ്രധാനമന്ത്രി ഭരണാധികാരികളുമായി കൂടിക്കാഴ്ച നടത്തും. കുവൈത്തിലെ ഇന്ത്യൻ സമൂഹത്തെയും അഭിസംബോധന ചെയ്യുന്നുണ്ട്. വിദേശകാര്യ മന്ത്രി എസ്.ജയ്ശങ്കറിന്റെ നേതൃത്വത്തിലുള്ള മന്ത്രിതലസംഘം ഓഗസ്റ്റിൽ കുവൈത്ത് സന്ദർശിച്ചിരുന്നു. കുവൈത്ത് വിദേശകാര്യ മന്ത്രി അബ്ദുല്ല അലി അൽ യഹിയ ഈ മാസം 3, 4 തീയതികളിൽ ഡൽഹി സന്ദർശിക്കുകയും പ്രധാനമന്ത്രി ഉൾപ്പെടെയുള്ളവരുമായി കൂടിക്കാഴ്ച നടത്തുകയും ചെയ്തിരുന്നു.