എം.സി ജോസഫൈന് അന്ത്യാഞ്ജലി; മൃതദേഹം മെഡിക്കൽ പഠനത്തിനു വിട്ടുനൽകി

അങ്കമാലി ∙ അന്തരിച്ച സിപിഎം നേതാവ് എം.സി. ജോസഫൈന് ആയിരങ്ങളുടെ അന്ത്യാഞ്ജലി. അങ്കമാലി കല്ലുപാലത്തെ വസതിയിലും പാർട്ടി ഏരിയ കമ്മിറ്റി ഓഫിസിലും സിഎസ്എ ഓഡിറ്റോറിയത്തിലും ഒട്ടേറെപ്പേർ ആദരാഞ്ജലി അർപ്പിച്ചു. പൊതുദർശനത്തിനു ശേഷം മൃതദേഹം മെഡിക്കൽ വിദ്യാർഥികളുടെ പഠനത്തിനായി എറണാകുളം ഗവ. മെഡിക്കൽ കോളജിനു കൈമാറി. 

കണ്ണൂരിൽ നിന്നു ഞായറാഴ്ച രാത്രി വീട്ടിലെത്തിച്ച മൃതദേഹം ഇന്നലെ രാവിലെ എട്ടരയോടെ ഏരിയ കമ്മിറ്റി ഓഫിസിൽ പൊതുദർശനത്തിനു വച്ചു. ഒൻപതരയോടെ അങ്കമാലി സിഎസ്എ ഓഡിറ്റോറിയത്തിലേക്കു മാറ്റി. ഉച്ചയ്ക്ക് 2 വരെ അവിടെ പൊതുദർശനം ഉണ്ടായിരുന്നു. വിവിധ ജില്ലകളിൽ നിന്നെത്തിയ പാർട്ടി നേതാക്കളും പ്രവർത്തകരും സമൂഹത്തിന്റെ നാനാതുറകളിൽ നിന്നുള്ളവരും അന്ത്യാഞ്ജലി അർപ്പിക്കാനെത്തി. 

മൃതദേഹം ഏറ്റുവാങ്ങാൻ മെഡി. കോളജ് അധികൃതർ കളമശേരിയിൽ നിന്ന് ഉച്ചയ്ക്ക് ഒന്നരയോടെ എത്തിയെങ്കിലും ആദരാഞ്ജലി അർപ്പിക്കാൻ ആളുകൾ എത്തിക്കൊണ്ടിരുന്നതിനാൽ‌ 2 മണിക്കു ശേഷമാണ് മൃതദേഹം കൊണ്ടുപോയത്. മുൻ എംഎൽഎ ജോൺ ഫെർണാണ്ടസ്, നഗരസഭാധ്യക്ഷ സീമ കണ്ണൻ, സിഐടിയു ജില്ലാ ജോയിന്റ് സെക്രട്ടറി മുജീബ് റഹ്‌മാൻ, സിപിഎം ഏരിയ സെക്രട്ടറി കെ.ബി.വർഗീസ് എന്നിവരുടെ സാന്നിധ്യത്തിൽ മെഡി. കോളജ് അത്യാഹിത വിഭാഗത്തിനു മുന്നിൽ സൂപ്രണ്ട് ഡോ. ഗണേശ് മോഹൻ മൃതദേഹം ഏറ്റുവാങ്ങി. 

English Summary: MC Josephine funeral