കണ്ണൂർ സെൻട്രൽ ജയിലിൽനിന്ന് ലഹരിക്കേസ് പ്രതി കടന്നു

കണ്ണൂർ ∙ സെൻട്രൽ ജയിലിലെ തടവുകാരൻ കോയ്യോട് സ്വദേശി ഹർഷാദ് ജയിൽ ചാടി. രാവിലെ 6.45ന് ജയിലിലേക്കുള്ള പത്രമെടുക്കാൻ പോയതാണ്. ദേശീയപാതയോരത്ത് ബൈക്കുമായി  കാത്തുനിന്ന ആൾക്കൊപ്പം  കടക്കുകയായിരുന്നു.

ഹെൽമറ്റ് ധരിച്ച ഒരാൾ ബൈക്ക് സ്റ്റാർട്ട് ചെയ്ത് ഏറെ നേരം ജയിലിനു മുന്നിൽ കാത്തുനിൽക്കുന്നതിന്റെ സിസിടിവി ദൃശ്യങ്ങൾ ലഭിച്ചിട്ടുണ്ട്. ജയിൽ വസ്ത്രത്തിൽ തന്നെയാണ് കടന്നത്. ബൈക്ക് കണ്ണൂർ ഭാഗത്തേക്കാണ് പോയത്. ലഹരിമരുന്ന് കേസിൽ പത്തുവർഷം തടവിനു ശിക്ഷിക്കപ്പെട്ട് 2023ൽ ആണ് ജയിലിൽ എത്തിയത്.  പത്രമെടുക്കാൻ പതിവായി ഇയാളാണ് പോയിരുന്നത്. അരമണിക്കൂർ കഴിഞ്ഞിട്ടും തിരിച്ചു വരാതിരുന്നതോടെയാണ് അന്വേഷണം തുടങ്ങിയത്. ജയിൽ അധികൃതർ ടൗൺ പൊലീസിൽ പരാതി നൽകി.