വിദേശജോലി തട്ടിപ്പ്: പ്രതി സോബിക്ക് 3 വർഷം കഠിനതടവും 5 ലക്ഷം പിഴയും
Mail This Article
കൊച്ചി∙ വിദേശത്തു ജോലി വാഗ്ദാനം ചെയ്തു തട്ടിപ്പു നടത്തിയ കേസിലെ പ്രതി കോതമംഗലം നെല്ലിമറ്റം സ്വദേശി സോബി ജോർജിനു (57) വിചാരണക്കോടതി 3 വർഷം കഠിനതടവും 5 ലക്ഷം രൂപ പിഴയും വിധിച്ചു. എറണാകുളം ചീഫ് ജുഡീഷ്യൽ മജിസ്ട്രേട്ട് എം.കെ.ഗണേഷാണു ശിക്ഷ വിധിച്ചത്. ജില്ലയിലെ വിവിധ കോടതികളിലായി സമാന സ്വഭാവമുള്ള 39 കേസുകളിൽ പ്രതിക്കെതിരെ കുറ്റപത്രം സമർപ്പിച്ചിട്ടുണ്ട്. പ്രോസിക്യൂഷനു വേണ്ടി ഡപ്യൂട്ടി ഡയറക്ടർ ഓഫ് പ്രോസിക്യൂഷൻ ഡോ എം.എസ്.ആരോമലുണ്ണി ഹാജരായി. എറണാകുളം സെൻട്രൽ പൊലീസാണ് അന്വേഷണം നടത്തി കുറ്റപത്രം സമർപ്പിച്ചത്.
വയലിനിസ്റ്റ് ബാലഭാസ്കറിന്റെ അപകട മരണം സംബന്ധിച്ചു സോബി ജോർജ് നടത്തിയ ആരോപണം മാധ്യമശ്രദ്ധ നേടിയിരുന്നു. പിന്നീട് ഈ ആരോപണത്തിൽ സിബിഐ അന്വേഷണം നടത്തിയെങ്കിലും മൊഴികൾ തെളിയിക്കാൻ സോബി ജോർജിനു കഴിഞ്ഞില്ല. അപകടസ്ഥലത്തു ദുരൂഹ സാഹചര്യത്തിൽ ചിലരെ കണ്ടതായി അതുവഴി കടന്നുപോകുമ്പോൾ കണ്ടതായാണു സോബി ജോർജ് ആരോപിച്ചത്.
