കാലിക്കറ്റ് വി.സിക്ക് തുടരാം; കാലടി വി.സിയുടെ അപ്പീൽ തള്ളി

കൊച്ചി ∙ കാലിക്കറ്റ് സർവകലാശാലാ വൈസ് ചാൻസലർ ഡോ. എം.കെ.ജയരാജിനെ പുറത്താക്കിയ ചാൻസലറുടെ നടപടി ഹൈക്കോടതി സ്റ്റേ ചെയ്തു. അതേസമയം, കാലടി ശ്രീ ശങ്കരാചാര്യ സംസ്കൃത സർവകലാശാലാ വി.സി ഡോ. എം.വി.നാരായണനെ പുറത്താക്കിയ നടപടി സ്റ്റേ ചെയ്യാൻ വിസമ്മതിച്ചു.

ചീഫ് സെക്രട്ടറിയെന്ന നിലയ്ക്ക് കാലിക്കറ്റിന്റെ സേർച് കമ്മിറ്റിയിൽ ഉൾപ്പെട്ട ടോം ജോസിന് ഉന്നതവിദ്യാഭ്യാസ മേഖലയുമായി ബന്ധമുണ്ടെന്ന വിസിയുടെ വാദം പരിഗണനാർഹമാണെന്ന് ജസ്റ്റിസ് സി.പി.മുഹമ്മദ് നിയാസിന്റെ ഇടക്കാല ഉത്തരവിൽ പറയുന്നു. 

അതിനിടെ, കാലടി വി.സിയുടെ ചുമതല കാലിക്കറ്റ് സർവകലാശാലാ സംസ്കൃത വിഭാഗം പ്രഫസറും ഓറിയന്റൽ സ്റ്റഡീസ് ഡീനുമായ ഡോ. കെ.കെ.ഗീതാകുമാരിക്കു നൽകി ഗവർണർ ആരിഫ് മുഹമ്മദ് ഖാൻ ഉത്തരവിറക്കി.