ജില്ലാ കേന്ദ്രങ്ങളിൽ പലസ്തീൻ ഐക്യദാർഢ്യം സംഘടിപ്പിക്കാൻ സിപിഎം

തിരുവനന്തപുരം∙ പലസ്തീന് ഐക്യദാർഢ്യവുമായി ജില്ലാ കേന്ദ്രങ്ങളിൽ പ്രതിഷേധ പരിപാടികൾ സംഘടിപ്പിക്കാൻ സിപിഎം തീരുമാനം. മേയ് 20ന് അകം പരിപാടികൾ നടത്തും. തെക്കൻ ഗാസ നഗരമായ റഫയിൽ ഹമാസ് വെടിനിർത്തൽ അംഗീകരിച്ചിട്ടും ഇസ്രയേൽ ആക്രമണം അഴിച്ചുവിടുകയാണെന്നും ഗാസയെ തകർക്കാൻ ഇസ്രയേൽ കോപ്പുകൂട്ടുകയാണെന്നും സിപിഎം സംസ്ഥാന സെക്രട്ടറി എം.വി.ഗോവിന്ദൻ പറഞ്ഞു.

ആത്മവിശ്വാസം നഷ്ടപ്പെട്ട നരേന്ദ്രമോദി വർഗീയ വിദ്വേഷം പ്രചരിപ്പിക്കുകയാണെന്നു ഗോവിന്ദൻ ആരോപിച്ചു. ഇതുപോലെ ‘ചീപ്പ്’ ആയ, ദുർബലനായ ഒരു പ്രധാനമന്ത്രിയെ രാജ്യം കണ്ടിട്ടില്ല. നെഞ്ചളവിന്റെ വീതിയും നീളവും വച്ചാണ് ആളുകൾ വലിയ പ്രതീക്ഷ പ്രകടിപ്പിച്ചത്. ദേവികുളം മുൻ എംഎൽഎ എസ്.രാജേന്ദ്രൻ പാർട്ടി വിടില്ലെന്നാണു തന്റെ വിശ്വാസമെന്നും പോകുന്നെങ്കിൽ പോകട്ടെയെന്നും ഗോവിന്ദൻ പറഞ്ഞു.