ടിവി ഉച്ചത്തിൽവച്ചു; അയൽവാസിയെ വെട്ടിയ യുവാവ് അറസ്റ്റിൽ

അടൂർ ∙ ടിവിയുടെ ശബ്ദം ഉച്ചത്തിൽ വച്ചതുമായി ബന്ധപ്പെട്ടുണ്ടായ തർക്കത്തെ തുടർന്ന് യുവാവിനെ വീട്ടിൽ കയറി വെട്ടിപ്പരുക്കേൽപിച്ച കേസിൽ അയൽവാസിയെ അറസ്റ്റ് ചെയ്തു. ഇളമണ്ണൂർ പൂതങ്കര സന്ദീപ് ഭവനിൽ സന്ദീപിനെയാണ് (33) അറസ്റ്റ് ചെയ്തത്. ഇളമണ്ണൂർ പൂതങ്കര കാവിൽ പടിഞ്ഞാറ്റേതിൽ അനീഷിനെ വെട്ടിപ്പരുക്കേൽപിച്ച കേസിലാണ് അറസ്റ്റ്. വെള്ളിയാഴ്ച രാത്രിയിലാണ് സംഭവം.

ടിവി ഉച്ചത്തിൽ വച്ചതുമായി ബന്ധപ്പെട്ട് സന്ദീപ് അനീഷിന്റെ വീട്ടിലെത്തി ചോദിക്കുകയും അസഭ്യം പറയുകയും ചെയ്തു. ഇതുചോദ്യം ചെയ്തപ്പോഴാണ് അനീഷിനെ അവിടെയുണ്ടായിരുന്ന വെട്ടുകത്തിവച്ച് തലയ്ക്കു വെട്ടിയതെന്നും ഇതുതടഞ്ഞപ്പോൾ കൈയ്ക്കു മുറിവേറ്റതായും പൊലീസ് പറഞ്ഞു. അനീഷിന്റെ മാതാവ് സത്യഭാമയുടെ മൊഴിയുടെ അടിസ്ഥാനത്തിൽ കേസെടുക്കുകയും സന്ദീപിനെ അറസ്റ്റ് ചെയ്യുകയുമായിരുന്നു.