ബിജെപി പ്രവർത്തകരെ ആക്രമിച്ച കേസ്: അർജുൻ ആയങ്കിയടക്കം 8 പേർക്ക് 5 വർഷം തടവ്

കണ്ണൂർ ∙ ബിജെപി പ്രവർത്തകരായ അഴീക്കൽ വെള്ളക്കൽ കലിക്കോട്ട് ഹൗസിൽ കെ.നിധിൻ, അഴീക്കൽ വെള്ളക്കലിലെ കെ.നിഖിൽ എന്നിവരെ ആക്രമിച്ച കേസിൽ അർജുൻ ആയങ്കി ഉൾപ്പെടെ 8 സിപിഎം പ്രവർത്തകർക്ക് 5 വർഷം തടവും 25,000 രൂപ പിഴയും ശിക്ഷ. കണ്ണൂർ അസിസ്റ്റന്റ് സെഷൻസ് കോടതി ജഡ്ജി എൻ.എസ്.രഘുനാഥാണ് ശിക്ഷ വിധിച്ചത്. അഴീക്കോട് വെള്ളക്കലിൽ 2017 നവംബർ 19ന് ആണ് കേസിന് ആസ്പദമായ സംഭവം.

വെള്ളക്കൽ സ്വദേശികളായ പൂച്ചിറ വളപ്പിൽ സജിത് (55), ജോബ് ജോൺസൺ (26), കെ.സുജിത് (56), എം.വി.ലജിത് (38), അർജുൻ ആയങ്കി (27), കെ.സുമിത് (30), കെ.ശരത് (28), സി.സായൂജ് (30) എന്നിവരെയാണു ശിക്ഷിച്ചത്. സംഘംചേർന്ന് വാൾ, ഇരുമ്പു കമ്പി എന്നിവ ഉപയോഗിച്ച് ആക്രമിച്ചു പരുക്കേൽപിച്ചെന്നാണു കേസ്. പ്രതികളെ കണ്ണൂർ സെൻട്രൽ‌ ജയിലിലേക്ക് അയച്ചു.