കുമരകത്തെ പുതിയ കള ശ്രീലങ്കൻ സ്വദേശി; ‘മലയൻ ഹംഗുവാന

കുമരകം ∙ പഞ്ചായത്തിലെ ഇത്തിക്കായൽ പ്രദേശത്തു കണ്ടെത്തിയ കള ഹംഗുവാന ആന്തേൽമിന്തിക്കയാണെന്നു ശാസ്ത്രജ്ഞർ. മലയൻ ഹംഗുവാന എന്നാണ് ഇതറിയപ്പെടുന്നത്. കുളവാഴ തകർത്ത വേമ്പനാട് തണ്ണീർത്തട ആവാസ വ്യവസ്ഥയ്ക്ക് പുതിയ ഭീഷണിയാണ് ഈ കള.

കൃഷി കഴിഞ്ഞു പാടത്ത് വെള്ളം കയറ്റിയിടുന്ന സമയത്ത് ഈ സസ്യം വളർന്നു വലുതാകും. പാടത്തെ പോള വാരി മാറ്റുന്നതു പോലെ ഇതു നീക്കം ചെയ്യാൻ കഴിയില്ല. യന്ത്രംകൊണ്ട് ഉഴുതുമറിച്ച് വേരോടെ നശിപ്പിച്ചാൽ മാത്രമേ വീണ്ടും വളരാതിരിക്കൂ. ഇവ നീക്കം ചെയ്യുന്നത് കൃഷിച്ചെലവു വർധിക്കാൻ ഇടയാകും. ശ്രീലങ്കയിൽ നിന്നാകാം ഈ സസ്യം കേരളത്തിൽ എത്തിയതെന്നാണു നിഗമനം.

പത്തനംതിട്ട തുരുത്തിക്കാട് ബിഎഎം കോളജ് ബോട്ടണി അധ്യാപകൻ ഡോ.അനൂപ് പി.ബാലൻ, കോഴിക്കോട് മലബാർ ബൊട്ടാണിക്കൽ ഗാർഡനിലെ ശാസ്ത്രജ്ഞൻ ഡോ. എൻ.എസ്.പ്രദീപ് എന്നിവരുടെ നേതൃത്വത്തിലുള്ള സംഘമാണു 2020ൽ ആദ്യമായി ഈ അധിനിവേശ സസ്യത്തിന്റെ വ്യാപനം റിപ്പോർട്ട് ചെയ്തത്. വ്യാപനം നിയന്ത്രിച്ചില്ലെങ്കിൽ കുളവാഴ പോലെ കേരളത്തിലെ തണ്ണീർത്തടങ്ങൾക്ക് ഇവ മറ്റൊരു ഭീഷണിയാകാൻ സാധ്യതയുണ്ടെന്നു ഡോ. അനൂപ് പറഞ്ഞു.