സ്പെഷൽ സ്കൂൾ കുട്ടികളടക്കം 75 പേർക്കു ഭക്ഷ്യവിഷബാധ

കളമശേരി ∙ കോഴിക്കോട്ടു നിന്നു വിനോദയാത്രയ്ക്കായി കൊച്ചിയിലെത്തിയ സ്പെഷൽ സ്കൂളിലെ കുട്ടികളടക്കം 75 പേർക്കു ഭക്ഷ്യ വിഷബാധ. ഛർദിയും വയറിളക്കവുമായി ഇവരെ എറണാകുളം ഗവ. മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ആരുടെയും നില ഗുരുതരമല്ല. രാത്രി 9.30 മണിയോടെയാണു കുട്ടികൾ ആശുപത്രിയിൽ ചികിത്സ തേടിയെത്തിയത്. 

കോഴിക്കോട് കട്ടിപ്പാറ കാരുണ്യതീരം സ്പെഷൽ സ്കൂളിലെ കുട്ടികളും അധ്യാപകരും രക്ഷിതാക്കളും 12 മണിക്കാണു മറൈൻ ഡ്രൈവിലെത്തിയത്. അവിടെ നിന്നു സ്വകാര്യ ട്രാവൽ ഏജൻസി ഏർപ്പെടുത്തിയ ബോട്ടിൽ കയറി യാത്ര ചെയ്തു. 

ബോട്ടിൽ ടൂർ ഓപ്പറേറ്റർ ഏർപ്പെടുത്തിയ വെജിറ്റേറിയൻ ഭക്ഷണം വിളമ്പിയിരുന്നു. 

ഇതിനു ശേഷം വൈകിട്ടോടെ ഇടപ്പള്ളിയിലെ മാൾ സന്ദർശിക്കുന്നതിനിടയിലാണു കുട്ടികൾ അസ്വസ്ഥത പ്രകടിപ്പിച്ചത്. ഉടൻ ഗവ. മെഡിക്കൽ കോളജിൽ എത്തിക്കുകയായിരുന്നു.