നവീൻ ബാബുവിന്റെ മരണവുമായി ബന്ധപ്പെട്ട തെറ്റായ പ്രചാരണം: സമൂഹമാധ്യമ പേജിനെതിരെ കേസ്

കണ്ണൂർ ∙ എഡിഎം കെ.നവീൻ ബാബുവിന്റെ മരണവുമായി ബന്ധപ്പെട്ട് തെറ്റായ പ്രചാരണം നടത്തിയതിന് ന്യൂസ് ഓഫ് മലയാളം എന്ന സമൂഹമാധ്യമ പേജിന്റെ അഡ്മിനെതിരെ കേസ്. ‘പണി കൊടുത്തത് ഇൻക്വസ്റ്റ് നടത്തിയ പൊലീസുകാരൻ, നവീന്റെ കൊലപാതകത്തിൽ കണ്ണൂരിൽ ഭൂകമ്പം’ എന്ന തലക്കെട്ടിൽ 10നു പ്രസിദ്ധീകരിച്ച പോസ്റ്റിനെതിരെയാണ് ടൗൺ പൊലീസ് സ്വമേധയാ കേസെടുത്തത്. അന്വേഷണത്തിലിരിക്കുന്ന കേസിൽ വ്യാജവിവരങ്ങളും അഭ്യൂഹങ്ങളും മനഃപൂർവം പ്രചരിപ്പിക്കുകയും പൊതുസമൂഹത്തിൽ ലഹള ഉണ്ടാക്കുംവിധം സമൂഹമാധ്യമങ്ങളിൽ പോസ്റ്റ് ചെയ്യുകയും ചെയ്തുവെന്നാണ് പ്രഥമവിവര റിപ്പോർട്ടിൽ പറയുന്നത്.