ആലപ്പുഴയിൽ 74% പ്രളയസാധ്യത; വിദഗ്ധ സമിതിയുടെ റിപ്പോർട്ട്

ന്യൂഡൽഹി ∙ രാജ്യത്ത് ഏറ്റവും അധികം പ്രളയ ഭീഷണിയും വരൾച്ച ഭീഷണിയും നേരിടുന്ന ജില്ലകളിൽ ആലപ്പുഴയും. കേന്ദ്ര ശാസ്ത്ര സാങ്കേതിക വകുപ്പിനു കീഴിൽ ഐഐടി ഗുവാഹത്തി, ഐഐടി മണ്ഡി, സെന്റർ ഫോർ സയൻസ് ആൻഡ് ടെക്നോളജി പോളിസി എന്നീ സ്ഥാപനങ്ങൾ ചേർന്നു തയാറാക്കിയ റിപ്പോർട്ടിലാണ് കണ്ടെത്തൽ. ആലപ്പുഴ ജില്ലയിൽ പ്രതിവർഷം 74% പ്രളയത്തിനും 75% വരൾച്ചയ്ക്കും സാധ്യതയുണ്ടെന്നാണ് റിപ്പോർട്ട്. കോട്ടയം ജില്ലയിൽ 73% വരൾച്ച ഭീഷണിയുണ്ട്. രാജ്യത്ത് ഏറ്റവും അധികം വരൾച്ച ഭീഷണിയുള്ള 50 ജില്ലകളിൽ കേരളത്തിൽ നിന്ന് ഉൾപ്പെട്ടിരിക്കുന്ന 2 ജില്ലകളാണിവ. രാജ്യത്തെ ജില്ലാതല കാലാവസ്ഥാ അപകടസാധ്യത മാപ്പിങ് 2018 മുതലാണ് ആരംഭിച്ചത്.