നികുതി കുടിശിക 14 കോടി കടന്നു, അക്കൗണ്ടിൽനിന്ന് നികുതി കുടിശിക പിടിച്ചു; പരിയാരം മെഡിക്കൽ കോളജിൽ പ്രതിസന്ധി

പരിയാരം (കണ്ണൂർ) ∙ നികുതി കുടിശിക 14 കോടി രൂപ കടന്നതോടെ കണ്ണൂർ പരിയാരം ഗവ. മെഡിക്കൽ കോളജിന്റെ ബാങ്ക് അക്കൗണ്ടിൽനിന്ന് 3.75 കോടിരൂപ ആദായനികുതി വകുപ്പ് പിടിച്ചെടുത്തു. സഹകരണ സംഘത്തിന്റെ കീഴിലായിരുന്ന 2000–2014 കാലയളവിൽ മെഡിക്കൽ കോളജ് ആദായ നികുതി കുടിശിക വരുത്തിയിരുന്നു. അന്ന് 50 ലക്ഷം രൂപ വർഷംതോറും അടച്ചാണ് പ്രശ്നം പരിഹരിച്ചത്. സർക്കാർ ഏറ്റെടുത്ത ശേഷം കുടിശിക അടയ്ക്കാതായതോടെയാണ് കേരള ബാങ്ക് അക്കൗണ്ടിൽനിന്നു പണം പിടിച്ചെടുത്തത്. പണം പിടിച്ചെടുത്തത് മെഡിക്കൽ കോളജിന്റെ ദൈനംദിന പ്രവർത്തനത്തെയും ബാധിച്ചു. വിരമിച്ച ജീവനക്കാരുടെ ആനുകൂല്യങ്ങളും നൽകാൻ കഴിയുന്നില്ല.