സിനിമ ലഹരി റാക്കറ്റ് കേസ്: നടി രാഗിണി ദ്വിവേദിക്ക് സുപ്രീം കോടതി ജാമ്യം

ബെംഗളൂരു ∙ കന്നഡ സിനിമ ലഹരി റാക്കറ്റ് കേസിൽ നടി രാഗിണി ദ്വിവേദിക്കു സുപ്രീം കോടതി ജാമ്യം അനുവദിച്ചു. സെപ്റ്റംബറിൽ അറസ്റ്റിലായ രാഗിണിക്കു 4 മാസത്തിനു ശേഷമാണ് ജാമ്യം ലഭിക്കുന്നത്. 

അറസ്റ്റിലായപ്പോൾ ലഹരി കടത്തിൽ ഇടപെട്ടിട്ടുള്ള മറ്റുള്ളവരുടെ പേര് ഇവർ വെളിപ്പെടുത്തിയിരുന്നുവെന്നും ജാമ്യം നൽകിയാൽ തെളിവുകൾ നശിപ്പിക്കാൻ സാധ്യതയുണ്ടെന്നും സംസ്ഥാന സർ‌ക്കാർ അഭിഭാഷകൻ വാദിച്ചു. എന്നാൽ ഇതുവരെ നടത്തിയ പരിശോധനയിൽ യാതൊരു തെളിവും തന്റെ കക്ഷിയിൽ നിന്നു കണ്ടെത്താനായിട്ടില്ലെന്നു രാഗിണിയുടെ അഭിഭാഷകൻ സിദ്ധാർഥ് ലൂത്ര വാദിച്ചു.

സെപ്റ്റംബറിൽ അറസ്റ്റിലായ രാഗിണി നവംബറിൽ ജാമ്യം തേടി കർണാടക ഹൈക്കോടതിയെ സമീപിച്ചെങ്കിലും തള്ളുകയായിരുന്നു. തുടർന്നാണ് ഇവർ സുപ്രീം കോടതിയെ സമീപിച്ചത്.

English Summary: Bail for Ragini Dwivedi in cinema drugs racket case