‘മുഖ്യമന്ത്രി വിശ്വാസികളോട് മാപ്പ് പറയണം; ബേബിക്ക് പാർട്ടിയിൽ ഒരു സ്ഥാനവുമില്ല’

പത്തനംതിട്ട ∙ എം.എ.ബേബി സിപിഎമ്മിൽ പാർശ്വവൽക്കരിക്കപ്പെട്ട നേതാവാണെന്നു ബിജെപി സംസ്ഥാന പ്രസിഡന്റ് കെ.സുരേന്ദ്രൻ. ബേബി റോഡ് സൈഡിലിരുന്നു പറയുന്നതല്ലാതെ പാർട്ടിയിൽ ഒരു സ്ഥാനവും ഇല്ല. ശബരിമല വിഷയത്തിൽ സിപിഎം നിലപാട് തെറ്റായിരുന്നുവെന്നു പറയാൻ മുഖ്യമന്ത്രി തയാറാവണം. സുഗതകുമാരിയുടെ വീടായ വാഴുവേലിൽ തറവാട് സംരക്ഷണ സംഗമം ഉദ്ഘാടനം ചെയ്യുകയായിരുന്നു അദ്ദേഹം. ശബരിമല വിഷയത്തിൽ സർക്കാർ പുതിയ സത്യവാങ്മൂലം നൽകുമെന്ന പ്രചാരണം തെറ്റാണെന്ന സിപിഎം പൊളിറ്റ് ബ്യൂറോ അംഗം എം.എ.ബേബിയുടെ പ്രസ്താവനയോടു പ്രതികരിക്കുകയായിരുന്നു സുരേന്ദ്രൻ.

ശബരിമലയിൽ തന്റെ സർക്കാർ ചെയ്തത് തെറ്റാണെന്ന് പരസ്യമായി സമ്മതിച്ച് മുഖ്യമന്ത്രി വിശ്വാസികളോട് മാപ്പ് പറയണമെന്നു സുരേന്ദ്രൻ ആവശ്യപ്പെട്ടു. നവോത്ഥാന നായക പരിവേഷം അണിഞ്ഞ മുഖ്യമന്ത്രിയാണ് നിലപാട് പറയേണ്ടത്. പരസ്യമായി നിലപാട് പറഞ്ഞശേഷം വേണം സത്യവാങ്മൂലം തിരുത്താൻ. സിപിഎമ്മിന്റെ മലക്കംമറിച്ചിൽ വിശ്വാസികൾ മുഖവിലയ്ക്കെടുക്കില്ല. കോടതിവിധിയുടെ മറവിൽ നടന്നതൊന്നും ഭക്തർ മറക്കില്ല. ആയിരം ഗംഗയിൽ കുളിച്ചാലും ശബരിമലയിൽ ചെയ്ത ക്രൂരതയ്ക്ക് സിപിഎമ്മിന് വിശ്വാസികൾ മാപ്പ് നൽകില്ലെന്നും സുരേന്ദ്രൻ പറഞ്ഞു.

English Summary: Sabarimala women entry remark: K. Surendran slams MA Baby