‘ഭാരതീയന് അഭിമാനിക്കാൻ ഒരു വ്യക്തിത്വം’; ഇ.ശ്രീധരന് ആശംസയുമായി മോഹൻലാൽ

കോട്ടയം ∙ ‘‘ഓരോ ഭാരതീയനും അഭിമാനിക്കാൻ നമുക്ക് ഇവിടെ ഒരു വ്യക്തിത്വമുണ്ട്, ഇ.ശ്രീധരൻ സർ..’’– ബിജെപിയുടെ പാലക്കാട്ടെ സ്ഥാനാർഥി മെട്രോമാൻ ഇ.ശ്രീധരന് വിജയാശംസ നേർന്ന് നടൻ മോഹൻലാലിന്റെ വിഡിയോ സന്ദേശത്തിൽനിന്നുള്ള വാക്കുകൾ. ഇ.ശ്രീധരന്റെ ജീവിതത്തിലെ പ്രധാനനേട്ടങ്ങൾ മോഹൻലാലിന്റെ വിഡിയോയിൽ എടുത്തുപറയുന്നു.

‘‘കൊടുങ്കാറ്റിൽ തകർന്ന പാമ്പൻ പാലം 46 ദിവസം കൊണ്ട് പുനർനിർമിച്ച ഇച്ഛാശക്തിയുടെ ഉടമ, അസാധ്യം എന്ന് ലോകം കരുതിയ കൊങ്കൺ റെയിൽവേ കരിങ്കൽ തുരങ്കങ്ങളിലൂടെ യാഥാർഥ്യമാക്കി. ഡൽഹി, കൊച്ചി മെട്രോ റെയിൽ നിർമാണത്തിന് നേതൃത്വം െകാടുത്ത രാഷ്ട്രശിൽപി. അനുവദിച്ച തുകയിൽ ബാക്കി വരുന്ന തുക സർക്കാരിന് മടക്കി നൽകുന്ന കറ‌കളഞ്ഞ വ്യക്തിത്വം, രാജ്യം പത്മവിഭൂഷൺ നൽകി ആദരിച്ച ഇ.ശ്രീധരൻ സാറിന് എന്റെ വിജയാശംസകൾ.’ – മോഹൻലാൽ‌ വിഡിയോയിൽ പറയുന്നു.

English Summary: Actor Mohanlal praises Metroman E Sreedharan