അഡ്മിനിസ്ട്രേറ്റർ പ്രഫുൽ പട്ടേൽ കൊച്ചിയിലെത്തി; ഒരാഴ്ച ലക്ഷദ്വീപിൽ

കൊച്ചി ∙ ലക്ഷദ്വീപ് അഡ്മിനിസ്ട്രേറ്റർ പ്രഫുൽ ഖോഡ പട്ടേൽ കൊച്ചിയിലെത്തി. ദ്വീപിലേക്കുള്ള യാത്രാമധ്യേയാണു കൊച്ചിയിൽ വിമാനമിറങ്ങിയത്. രാത്രിയിൽ കൊച്ചിയിൽ തങ്ങുന്ന അദ്ദേഹം ചൊവ്വാഴ്ച രാവിലെ ഹെലികോപ്റ്ററിൽ ദ്വീപിലേക്കു തിരിക്കും. ഒരാഴ്ച നീളുന്ന സന്ദർശനത്തിനിടെ നിലവിൽ നടപ്പാക്കുന്ന ഭരണപരിഷ്കാരങ്ങളുടെ പുരോഗതി വിലയിരുത്തും.

പ്രതിഷേധ സാധ്യതകൾ നിലനിൽക്കുന്നതിനാൽ വൈ കാറ്റഗറി സുരക്ഷയാണു പ്രഫുൽ പട്ടേലിന് അനുവദിച്ചിട്ടുള്ളത്. നേരത്തേ വ്യോമസേനയുടെ പ്രത്യേക വിമാനത്തിലായിരുന്നു ദ്വീപ് സന്ദർശനം. വൻ സാമ്പത്തിക ധൂർത്തെന്ന തരത്തിൽ വാർത്ത വന്നതോടെ പ്രത്യേക വിമാനയാത്ര ഇത്തവണ ഒഴിവാക്കുകയായിരുന്നു.

English Summary: Administrator Praful Khoda Patel landed in Kochi to visit Lakshadweep