മുലപ്പാലില്‍ വിട്ടുവീഴ്ചയില്ല, ‘മദ്യത്തിലും’; ദീദീ മാ അവതാരത്തിൽ ഉമ: ലക്ഷ്യം മുഖ്യമന്ത്രി കസേര?

മുലപ്പാലും മദ്യവുമായി എത്തുന്ന ഉമ. ചോദിക്കരുത് ഏതു ഉമ, എന്തു ഉമ എന്ന്. ദേശീയ രാഷ്ട്രീയത്തിൽ ഒരു ഉമയെയുള്ളൂ - അത് ബിജെപിയിലെ ഉമാ ഭാരതി മാത്രം. അൽപകാലത്തെ രാഷ്ട്രീയ വനവാസത്തിന് ശേഷം വീണ്ടും പൊതുസദസ്സുകളിൽ സജീവമാവുകയാണ് ഉമ ഭാരതി. അങ്ങനെ തിരിച്ചുവരാൻ ആഗ്രഹിക്കുന്ന ഉമയ്ക്കു വീണുകിട്ടിയതാണ് അൽപം മുലപ്പാൽ; കൂട്ടത്തിൽ അൽപം മദ്യവും. ജൈന സാധു ആചാര്യ വിദ്യാസാഗറിന്റെ ആവശ്യപ്രകാരം കുടുംബവും ബന്ധുക്കളുമായുള്ള എല്ലാ കെട്ടുപാടുകളും അവസാനിപ്പിക്കുന്നതായും നവംബർ 17 മുതൽ മുതൽ ‘ദീദി മാ’ എന്ന പേരിലാകും താൻ അറിയപ്പെടുക എന്നും വെളിപ്പെടുത്തി ഉമ ഭാരതി വീണ്ടും രാഷ്ട്രീയ– സാമൂഹിക കേന്ദ്രങ്ങളെ ഞെട്ടിച്ചിരിക്കുകയാണ്. മധ്യപ്രദേശ് സംസ്ഥാന സർക്കാരിനെ കടന്നാക്രമിക്കുന്ന നിലപാടുകൾക്കു പിന്നാലെയാണ് ആധ്യാത്മികതയിലേക്കുള്ള ഉമയുടെ ചുവടുവയ്പ്പ് എന്നതും ശ്രദ്ധേയമാണ്. ഉമയുടെ മനസ്സിലെന്താണ്? കേന്ദ്ര മന്ത്രി ആകുന്നതിനു മുൻപ് മധ്യപ്രദേശ് മുഖ്യമന്ത്രിയായിരുന്നു ഉമ. ആ പഴയ സ്ഥാനം ലക്ഷ്യമിട്ടാണോ ഉമയുടെ നീക്കങ്ങൾ?